dunya rusiyening bucha shehiridiki wehshiylikini eyiblimekte

türkiye awazi radiyosi xewiri: nato bash katipi stolténbérg rusiyening ukrainadiki puqralargha yürgüzgen «wehshiylik» lerni qobul qilghili bolmaydighanliqini we jawabkarlarning sotlinishi kéreklikini éytti.

nato bash katipi stolténbérg amérika s n n téléwiziye qanilining «birlikning ehwali» namliq pirogrammigha qatnashti.

u rusiye armiyesining ukrainadiki urush jinayetliri toghrisida toxtilip: «bu, biz yawropada bir qanche on yildin béri körmigen puqralargha qilinghan wehshiylik. puqralarning hujum nishani qilinishini we öltürülüshini qetiy qobul qilghili bolmaydu» dédi.

u wehshiyliklerni axirlashturush kéreklikini tekitlep, rusiye pirézidénti wladimir putinning bu urushni toxtitish mesuliyiti barliqini bildürdi.

u xelqara jinayi sot mehkimisining ukrainadiki urush jinayetliri üstide délo turghuzushi, barliq heqiqetlerni ashkarilishi we jawabkarlarni sotqa tartishning intayin muhim ikenlikini tekitlep: «bu sewebtin, xelqara jinayi ishlar sot mehkimisi teripidin qiliniwatqan tekshürüshni memnunluq bilen qarshi alimen» dédi.

b d t bash katipi antoniyo gutérrs bu heqte élan qilghan bayanatida, ukrainaning bucha shehiride öltürülgen puqralarning jesetliridin chöchüp ketkenlikini éytti.

u puqralarning ölümige munasiwetlik tekshürüsh bashlashni chaqiriq qilip: «musteqil tekshürüsh, sotqa tartish üchün zörür» dédi.

amérika tashqi ishlar ministiri antoni blinkén bucha shehiride tépilghan puqralarning jesetliri mesiliside rusiyeni eyiblidi.

u twittérda uchur hembehirlep: «buchada we pütkül ukrainada krémil küchlirining wehshiylikini shiddet bilen eyibleymiz» dédi.

u puqralargha yürgüzülgen qeliamning jawabkarlirini jazalash üchün qolliridiki barliq wastilerdin paydilinidighanliqlirini, yüz bergen wehshiyliklerni höjjetleshtürüp, bu heqtiki melumatlarni ortaqlishidighanliqlirini qeyt qildi.

engliye bash weziri boris jonsonmu rusiyening ukrainaning irpin we bucha sheherliride bigunah puqralargha qilghan «peskeshlerche hujumliri» ning, putin we armiyesining «urush jinayiti» ötküzgenlikining yene bir ispati ikenlikini tekitlidi.

bash wezir boris jonson yazma bayanatida, krémilning inkarliri yaki tetür teshwiqat qilishining, hemme toghra ikenlikini bilgen sheyiylerni yoshuralmaydighanliqini eskertip: «putin amalsiz, ishghal herikiti meghlub bolmaqta. ukrainaning qetiy iradesi héchqachan bunchilik küchlük bolup baqmighan idi» dédi.

u engliyening, xelqara jinayi ishlar sot mehkimisining ukrainada ötküzülgen jinayetler toghrisidiki tekshürüshini qollash sépining aldinqi qataridin orun alghanliqini bildürüp, ukrainagha yéngi mutexessis teptish xadimlirining ewetilidighanliqini qeyt qildi.

girétsiye bash ministiri kiryakos michotakis twittérda hembehirligen uchurida, girétsiyening ukrainani qollaydighanliqini bildürüp: «buchada puqralargha qarshi ötküzülgen jinayetler kishini chöchütidu. jinayetchiler sotqa tartilishi kérek» dédi.

italiye bash ministiri mariyo dragi yazma bayanatida, bucha we bashqa sheherlerdin kelgen fotograf we widéolarning «kishini chöchütidighanliqi» ni bildürdi.

u: «qolida tömürning sunuqimu yoq puqralargha yürgüzülgen qetliam wehshiyliki nahayiti qorqunchliq we chidap turghili bolmaydu. rusiye dairiliri derhal düshmenlik qilishni axirlashturushi, puqralargha qiliniwatqan wehshiyliklerni toxtitishi we yüz bergen wehshiyliklerning hésabini bérishi kérek. italiye bu wehshiylikni qetiylik bilen eyibleydu, shundaqla ukraina we xelqi bilen birge ikenlikini bildüridu» dédi.

ispaniye bash minstiri pédro sanchézmu paytext madridta qilghan sözide, bucha shehiridin chékingen rusiye eskerlirining arqisida qaldurghan puqralarning ölümlirige munasiwetlik körünüshlerning, urush jinayiti ikenlikining ispati ikenlikini ilgiri sürdi.

u: «bu urush jinayetlirini ötküzgenlerning jazasiz qalmasliqi we insaniyetke qarshi ötküzülgen we irqiy qirghinchiliq dep atashqimu bolidighan mezkur weqege sewebchi bolghanlarning, xelqara jinayi ishlar sot mehkimiside sotqa tartilishi üchün mumkin bolghan imkaniyetlerning hemmisidin paydilinimiz» dédi.

ukraina armiyesi 1-aprél (2022) paytext kiyéw etrapidiki bucha shehirini rusiye armiyesidin azad qilghanda, xarabilikke aylanghan we kochiliri jesetke tolup ketken bir sheher dunyaning köz aldida namayan bolghan idi.