дунйа сәһийә тәшкилати рус ваксиниси «сипутник V»ни баһалаш хизмитини кечиктүрди
дунйа сәһийә тәшкилати русийә-украина уруши сәвәбидин русийәниң ковид-19 ға қарши тәрәққий қилдурған ваксиниси сипутник V ни баһалаш хизмәтлириниң кечиктүрүлгәнликини уқтурди.
түркийә авази радийоси хәвири: дунйа сәһийә тәшкилатиниң ваксина мутәхәссиси дохтур мариангела симав тәшкилатниң җәнвәдики баш оргинида өткүзүлгән мухбирларни күтүвелиш йиғинида мухбирларниң соаллириға җаваб берип, сипутник V ниң җиддий ишлитилиши тоғрисида қарар чиқириш үчүн дунйа сәһийә тәшкилати вәкилләр өмикиниң 7-март ишқа ашурушни пиланлаватқан русийә зийаритини кечиктүргәнликини, «баһалаш зийаритиниң йеңи вақтиниң әң қисқа ичидә бекитилидиғанлиқи»ни оттуриға қойди.
дунйа сәһийә тәшкилати өткән йили сипутник V нииң җиддий ишлитилишини тәстиқлашни ойлишиватқанлиқини уқтурғаниди.
җиддий ишлитилиши тәстиқланған тәқдирдә, русийәниң сипутник V ваксиниси оттура вә төвән киримлик дөләтләрни ваксина билән тәминләш пирограммиси COVAX ға киргүзүләтти.
русийә армийәсиниң 24-феврал украинаға бесип кирип, ишғал һәрикитини башлишидин кейин, москва һөкүмитигә қарши җазалар йүргүзүлгәниди.
