rusiye b d t ning eyiblesh qararini ret qildi, bezi döletler bélet tashlashtin yaltaydi

türkiye awazi radiyosi xewiri: «rusiyening ukrainagha qilghan hujumini eyiblesh teklipi bilen» amérikaning nyuyork shehiridiki birleshken döletler teshkilati (b d t) bash ishtabida chaqirilghan xewpsizlik kéngishi yighini rusiye bash elchisi wassili nébizianing ret qilish hoquqidin paydilinishi sewebidin ünümsiz axirlashti.

nébizia «ret» béliti tashlash arqiliq yighin ishtirakchilirining rusiyening ukrainagha qaratqan nöwettiki hujumini eyibleydighan qarar layihesi élan qilishigha tosqunluq qildi.

ukraina daimiy wekili, bash elchi sérgéy kislitsa rus bash elchisining ret qilish qararigha naraziliq bildürüp: «dölitimge qarshi qiliniwatqan bu urush minglarche rus eskirining jesiti rusiyediki anilirigha ewetilmigüche axirlashmaydu» dédi. yighinda, ikki daimiy bash elchi otturisida keskin talash – tartishlar bolup ötti.

b d t bash katipi antoniyo gutérrés, rusiye terep eyiblesh qararini ret qilghan xewpsizlik kéngishi yighinidin kéyin bayanat élan qilip, b d t ning urushni toxtitish üchün tirishchanliq körsetken bolsimu, emma bu nishanigha yételmigenlikini otturigha qoydi.

u mundaq dédi: «biz hergizmu waz kechmeslikimiz, tinchliqqa yene bir qétim purset bérishimiz kérek. rehberler diyalog we tinchliqqa yüzlinishi, eskerler gazarmilirigha qaytishi lazim».

ukrainadiki insanperwerlik éhtiyajining kündin - künge éshiwatqanliqini tekitligen bash katip, kem dégende 100 ming ukrainaliqning öy - makanliridin ayrilghanliqi we köpinchisining qoshna döletlerge qéchip ketkenlikini éytti.

gutérrés, rusiye terep eyiblesh qararini ret qilghan, xitay, hindistan we ereb birleshme xelipiliki bélet tashlashtin waz kechken xewpsizlik kéngishi yighinidin kéyinla, emin ewadni b d t ning ukraina kirizisigha mesul maslashturghuchi emeldari qilip teyinligenlikini jakarlidi.

rusiye 24 - féwral ukrainagha qarshi herbiy heriket qozghighanidi.