putin bilen makron mesilini diplomatik yollar bilen hel qilishni teshebbus qildi

türkiye awazi radiyosi xewiri: rusiye pirézidénti wladimir putin bilen firansiye pirézidénti makron téléfonda körüshti.

rusiye krémil sariyining bayanatida, putin bilen makronning ukraina etrapidiki weziyet heqqide keng dairide özara pikir almashturup, rusiyening xewpsizlik kapaletliri mesilisini muzakire qilghanliqi qeyt qilindi.

bayanatta: «téléfon söhbitide, donbastiki aldinqi sepning tuyuqsiz yamanlishishi toghrisida chong endisheler tilgha élindi. putin jiddiychilikning yamanlishishidiki sewebning ukraina xewpsizlik küchlirining ighwagerchiliki ikenlikini qeyt qildi» déyildi.

bayanatta yene, kiyéw hökümitining «namda muzakire musapisini dawamlashturuwatqanliqi, emma minsk kélishimliri we normandiye formatida tüzülgen kélishimlerni ijra qilishni ret qiliwatqanliqi» ilgiri sürüldi.

firansiye élsi sariyining yazma bayanatida bildürülishiche, makron bilen putin normandiye formati ramkisidiki tirishchanliqlarning qaytidin bashlinishi we ukrainaning yéqinqi künlerde sunghan tekliplirining muzakire qilinishi üstide pikir birliki hasil qilghan.

makron bilen putin gérmaniye, firansiye, rusiye we ukraina töt terep yighini ötküzülüshi üchün xizmet qilish kéreklikini eskertip, ukrainaning sherqide urush toxtitishni kapaletke ige qilish tirishchanliqlirini körsitishte kélishim hasil qilish bilen birge, jiddiychilikni peseytish we tinchliqni ornitish üchün zörür qedemlerni tashlashning ehmiyitini tekitlidi.