nato yighinida rusiye – ukraina kirizisi muzakire qilindi
shimaliy atlantik ehdi teshkilati dölet mudapie ministirliri yighinida rusiyege ukrainadin qisimlirini chékindürüsh we yawropaning bixeterliki üchün diyalog we diplomatiye yolini tallashqa chaqiriq qilindi.
türkiye awazi radiyosi xewiri: bélgiyening paytexti biryusséldiki shimaliy atlantik ehdi teshkilati qarargahida chaqirilghan nato dölet mudapie ministirliri yighini esnasida, ukrainaning weziyiti heqqide bayanname élan qilindi.
bayannamede, rusiyening ukraina chégrasigha qoshun orunlashturushidin qattiq endishe qiliniwatqanliqi eskertilip mundaq déyildi: «rusiyeni eng küchlük shekilde diplomatiye yolini tallashqa, chégra rayonlargha qoshun orunlashturushning del eksiche, xelqaraliq ehdilirige asasen, chégra rayonlardiki qisimlirini chékindürüshke chaqirimiz.»
rusiyege taqabil turushtin sirt yene, diyalog ornitish pozitsiyesining dawamlashturulidighanliqi tekitlengen bayannamede, rusiyening bu herbiy paaliyetlirining yawropa – atlantikning bixeterlikige tehdit shekillendürüwatqanliqi, shu wejidin, shimaliy atlantik ehdi teshkilatining sherqte herbiy maewjudiyitini kücheytiwatqanliqi qeyt qilinip mundaq déyildi: «mudapie we tehditke taqabil turush meydanimizni téximu kücheytishke teyyarmiz.»
natoning ukrainaning zémin pütünlüki, igilik hoquqi we musteqilliqini dawamliq qollaydighanliqi eskertilgen bayannamede, her bir döletning öz yolini tallash hoquqi barliqi, rusiyening tajawuzchiliq pozitsiyesining éghir aqiwetlerni keltürüp chiqiridighanliqi tekitlinip mundaq déyildi: «shimaliy atlantik ehdi teshkilati we ittipaqdashlar, rusiye bilen yawropa – atlantikning bixeterliki mesililiride eng yuqiri derijilik rehberler sewiyeliridikinimu öz ichige alghan diplomatiye we diyalog yoli boyiche ish körüshni dawamlashturmaqta.»
shimaliy atlantik ehdi teshkilati dölet mudapie ministirliri, yawropa bixeterlik we hemkarliq teshkilatining nöwetchi reisi polsha ishqa kirishtürgen yéngilanghan yawropa bixeterliki diyalogigha teyyar ikenliklirini bildürdi, hemde rusiyege ilgiri bixeterlik mesiliside sunulghan tekliplerge inkas qayturidighanliqlirini otturigha qoydi.
