blinkén nato we firansiye rehberliri bilen körüshti

türkiye awazi radiyosi xewiri: amérika tashqi ishlar ministirliqi bayanatchisi néd prays yazma bayanat élan qilip, blinkénning firansiye tashqi ishlar ministiri lé jriyan we nato bash katipi stolténbérg bilen körüshkenlikini bildürdi.

u blinkén-stolténbérg körüshüshide, rehberlerning amérikaning ittipaqdashliri we shérikliri bilen yéqin hemkarliq hemde özara meslihetlishish wedilirini tekrarlighanliqini qeyt qildi.

u: «ministir blinkén, amérikaning ukrainagha qarshi herbiy hujum qilinghan ehwalda rusiyege téz sürette éghir bedel tölitishke teyyar ikenlikini tekitlidi. blinkén bilen bash katip stolténbérg rusiyeni jiddiychilikni peseytish, özara ehmiyetlik diyaloglarni ötküzüshke ilhamlandurush qatarliq diplomatik tirishchanliqlardin bashqa, amérika we ittipaqdashlirining natoning sherqiy qanitini kücheytish üchün qiliwatqan herbiy orunlashturushlarni muzakire qildi» dédi.

u ministir blinkénning firansiye tashqi ishlar ministiri lé jriyan bilen körüshüshi üstide toxtilip, ikki ministirning nato ittipaqdashliri, yawropa ittipaqi ezaliri, G7 ezaliri we bashqa shériklerning, rusiyening ukraina chégralirida dawamliq esker toplishigha qarshi körsitiwatqan ortaq tirishchanliqlirini muzakire qilghanliqini qeyt qildi. u bu heqte mundaq dédi:

«ministirlar ukrainaning igilik hoquqini we zémin pütünlükini dawamliq qollashning, rusiye ukrainani téximu köp ishghal qilghan ehwalda duchar bolidighan éghir iqtisadiy bedellerni bildürüshning ehmiyitini tekitlidi.»