rusiyening xitay bilen yéqin munasiwet ornitishi, émbargolargha aqmaydu
amérika tashqi ishlar ministirliqi bayanatchisi prays rusiye ukrainani ishghal qilghan ehwalda, émbargolarning tesirini azaytish üchün xitay bilen yéqin munasiwet ornatsimu, moskwagha tölitilidighan iqtisadiy bedelge kar qilmaydighanliqini éytti.
türkiye awazi radiyosi xewiri: amérika tashqi ishlar ministirliqi bayanatchisi néd prays kündilik axbarat élan qilish yighinida, rusiye-ukraina kirizisi üstide toxtilip, rusiye ukrainagha tajawuz qilghan ehwalda amérikaning éghir iqtisadiy émbargosigha duchar bolidighanliqini tekrarlidi.
u rusiyening émbargolarning tesirini azaytish üchün xitay bilen yéqin munasiwet ornitishqa tirishiwatqanliqi toghrisidiki soalgha: «ukrainaning ishghal qilinishi, peqet ukraina we yawropa üchünla emes, belki xitayni öz ichige alghan rayon sirtidiki döletlergimu tesir qilidu» dédi.
u amérika tashqi ishlar ministiri antoni blinkénning xitay tashqi ishlar ministiri wang yi bilen körüshkende, rusiyening urushqaqliqi seweb bolidighan dunya xewpsizliki we iqtisadiy xeterlerning intayin éghir bolidighanliqini tekitlep, xitayningmu buning tesirige uchraydighanliqini éytqanliqini bildürdi.
u ukrainani ishghal qilishning, rusiyege nahayiti éghir iqtisadiy bedellirining bolidighanliqini bildürüp: «rusiye xitay bilen yéqin munasiwet ornitip, bu aqiwetlerning bir qismining ornini tolduralaymen, bir qismining bésimini yenggilliteleymen dep oylighan bolsa, ehwal undaq emes. émbargolar rusiye iqtisadini nurghun jehettin téximu ajizlitidu. mesilen, asasiy téxnologiyelerning menbesining qeyerdin kelgenlikige qarisaqla bolidu. bular hazirmu gherbtin kélidu. özini özi gherb bilen soda qilishtin, gherb bilen yawropadin we amérikadin import qilishtin mehrum qilidu. ishlepchiqirish hejimini we yéngiliq yaritish yoshurun küchini éghir töwenlitiwétidu» dédi.
