8 dölet b d t gha bolghan qerzi sewebidin awaz bérish hoquqidin mehrum boldi

türkiye awazi radiyosi xewiri: birleshken döletler teshkilati nizamnamisining 19-maddisidiki belgilimige asasen, eger bir döletning b d t gha bolghan qerzi yéqinqi 2 yilda töliginidin köp bolsa, bu döletning birleshken döletler teshkilati omumiy kéngishide awaz bérish hoquqi toxtitilidu.

birleshken döletler teshkilati omumiy kéngishining bayanatchisi pawlina kubiyak, b d t gha eza 11 döletning teshkilatqa bolghan qerzini töleshni kéchiktürgenlikini, bu döletlerdin 8 ining tünügündin bashlap  awaz bérish hoquqidin mehrum bolghanliqini éytti.

birleshken döletler teshkilati omumiy kéngishide awaz bérish hoquqidin ayrilip qalghan döletler iran, wénézuéla, sudan, kongo, giwinéye,  papua yéngi giwinéyesi, antigua we barbuda , wanuatu qatarliq ellerni öz ichige alidu.

iran aldinqi yilimu birleshken döletler teshkilatigha bolghan 65 milyon dollardin artuq qerzini töleshni kéchiktürgenliki üchün, b d t omumiy kéngishide bélet tashlash hoquqidin mehrum qalghan we eng töwen chek bolghan 16 milyon dollar tölesh arqiliq tekrar awaz bérish hoquqigha érishkenidi.

iran, amérika qoshma ishtatlirining «qanunsiz émbargoliri» sewebidin birleshken döletler teshkilatigha bolghan  qerzini töliyelmeydighanliqini ilgiri sürgenidi.

iranning tekrar awaz bérish hoquqigha érishelishi üchün 10 milyon dollardin artuq, wénézuélaning bolsa 39.8 milyon dollardin artuq pul tölishige toghra kélidu.

iran tashqi ishlar ministirliqi bayanatchisi seir xatibzade, bu heqte élan qilghan bayanatida, mundaq dédi: «tolimu epsuski, uda ikki yildin buyan amérika qoshma ishtatlirining resimsizlerche we qanunsiz émbargoliri sewebidin, dölitimiz qerzlirini töleshte qiyin ötkelge duch kelmekte.»