kanada soti iranni tölem töleshke höküm qildi

türkiye awazi radiyosi xewiri: ukraina ayropilan weqeside jénidin ayrilghan alte kanada puqrasining aililirining qilghan erzi netijiside échilghan sotning hökümi élan qilindi.

sotning hökümige asaslanghanda, ontariyo (Ontario) aliy sot mehkimisining sotchisi édward bélobaba (Edward Belobaba) ayropilan weqeside jénidin ayrilghan alte kishining warisliri otturisida bölüp bérish üchün 100 milyon dollarliq tölemning tölinishige höküm qilghan.

sotchi bélobaba yene, jénidin ayrilghanlarning aile ezalirigha yétekchilik, ghemxorluq we dostluqni yoqitip qoyghanliqi üchün 1 milyon dollar, tartqan azab-oqubetler üchün 6 milyon dollar tölem bérilishige höküm qilghan.

sotqa erz sunghan shahin moghaddam, méhrizad zarei, eli gorji bilen iran hakimiyitining öch élishidin qorqqan we nam-sheripini mexpiy tutqan üch kishining adwokati mark arnold (Mark Arnold) s b s téléwiziyesining ziyaritini qobul qilghanda, tölemning emelge éshishi üchün qilishqa tégishlik ishlarni qilidighanliqlirini bildürdi.

u kanada we chet ellerdiki iran mal-mülüklirining musadire qilinidighanliqini, iranning bashqa döletlerde néfit paraxotlirining barliqini eskertip, qurbanlar aililirining tölemni élishi üchün qanun kürishini dawamlashturidighanliqlirini tekitlidi.

u: «bu mesilidiki qanuniy küresh oxshimighan ikki xil ölchemge ige. biz shexsiy kürishimizni dawamlashturuwatimiz. emma, kanada hökümiti tégishlik ishni qilmaywatidu. men bash ministir trudoning ziyankeshlikke uchrighuchilarning aile-tawabiatlirigha yardem qilishini telep qilimen» dédi.

ukraina hawa yolliri shirkitining «737-boyin» tipliq yoluchilar ayropilani 2020-yili 8-yanwar kiyéwgha qarap uchush üchün xelqara téhran imam humeyni ayrodurumidin kökke kötürülüp uzun ötmey étip chüshürüwétilgen idi. ayropilandiki 176 kishining hemmisi jénidin ayrilghan idi. bularning arisida 63 kanada puqrasining barliqi uqturulghan idi.

iran dairiliri deslepte ayropilanning étip chüshürülgenlikini étirap qilmighan, emma iran armiye bash ishtabi ayropilanning «nahayiti sezgür herbiy nuqta» üstidin uchup ötüwatqanda «insaniy xata» tüpeylidin hawa qoghdinish sistémisi teripidin étilghan ikki bashqurulidighan bombining chüshürüwetkenliki toghrisida bayanat élan qilghan idi.

iran hakimiyiti weqe yüz bérip aridin bir yil ötkendin kéyin, 2020-yili 30dékabir jénidin ayrilghanlarning her bir ailisige 150 ming dollar tölem béridighanliqini uqturghan idi.