b d t «pakiz muhitning insan hoquqi» ikenliki toghrisidiki layiheni qobul qildi
birleshken döletler teshkilati (b d t) kishilik hoquq kéngishining 48-nöwetlik yighinida, «pakiz muhitning insan hoquqi ikenliki» otturigha qoyulghan qanun layihesi köp sanliqning qollap bélet tashlishi bilen qobul qilindi.
türkiye awazi radiyosi xewiri: b d t ning jenwediki ishxanisida ötküzülgen yighinda, 43 eza dölet kostarika, moldawiye, marakesh, slowéniye we shiwéytsariye tapshurghan qanun layihesini qollap bélet tashlidi, rusiye, hindistan, xitay we yaponiye bélet tashlashtin waz kechti.
47 ezadin terkib tapqan kéngesh köp sanliqning qollap bélet tashlishi bilen maqulllighan bu qanun layiheside «pakiz, saghlam we sijil muhitning insan hoquqi» ikenliki qarar qilindi.
yighindin kéyin b d t kishilik hoquq aliy komissari mishél bachélét yazma bayanat élan qilip, bu qanun layihesining maqullanghanliqidin xushalliq hés qilghanliqini otturigha qoydi.
bachélét kéngeshning tunji qétim bundaq qarar chiqarghanliqini tilgha élip: «bu qarar insanlarni, yersharimizni, biz nepesliniwatqan hawani, ichidighan suni we biz yeydighan yémekliklerni qoghdashni körsitidu» dédi.
u dunyadiki her qaysi döletlerni mezkur qararni ijra qilishqa chaqirip: «muhit asrash heriketliri bilen kishilik hoquqni qoghdash otturisidiki xata perqlendürüshtin halqip kétish üchün, biz choqum bu heriketlendürgüch küchni tereqqiy qildurushimiz kérek. éniqki, her ikki nishangha bir – biridin musteqil halda yetkili bolmaydighanliqi nahayiti roshen» dégenlerni qeyt qildi.
