blinkén tunis pirézidéntini kishilik hoquq we erkinlikke hörmet qilishqa chaqirdi

türkiye awazi radiyosi xewiri: tunis pirézidéntliq mehkimisining yazma bayanatigha asaslanghanda, amérika tashqi ishlar ministiri antoni blinkén tünügün (2021-yili 26-iyul) kechte qayis seidqa téléfon qilghan.

téléfon söhbitide, tunis pirézidénti qanuniyliq, kishilik hoquq we erkinliklerge hörmet qilishni xalaydighanliqini, yolgha qoyulghan tedbirlerning, asasiy qanun étirap qilghan idare-organlarni we döletni qoghdash, shundaqla jemiyet tinchliqini kapaletke ige qilish üchün, asasiy qanunning 80-maddisini ijra qilish ramkisida emelge ashqanliqini ilgiri sürdi.

amérika tashqi ishlar ministiri blinkén twittérda, tunis pirézidénti qayis seid bilen téléfonda yaxshi söhbet ötküzgenlikini qeyt qilip, tunisning nöwettiki weziyitini muzakire qilghanliqlirini we tunisning démokratiyesini qollaydighanliqlirini bildürdi.

u yuqiridiki bayanatidin uzun ötmeyla twittérda yene bir bayanat élan qildi. u mezkur bayanatida mundaq adédi:

«tunis pirézidénti qayis seidqa hakimiyetning asasi bolghan kishilik hoquq we démokratik pirinsiplargha boysunushni teshebbus qildim. barliq siyasiy aktiyorlar we tunis xelqi bilen diyalogni dawamlashturushqa chaqirdim.»

tunista hökümet we öktichi partiyelerge qarshi namayishlar partlighan bolup, yüz bergen weqelerde naxda partiyesini öz ichige alghan partiye merkezlirige hujum qilinghan idi.

tunis pirézdénti qayis seid parlaméntning barliq hoquqini tonglatqanliqini, parlamént ezaliriningmu alahide imtiyazlirini tonglatqanliqini, mewjut bash ministir hisham elméshishini wezipisidin qaldurghanliqini we özi wezipige teyinleydighan bash ministir bilen hakimiyetni ötküzüwalidighanliqini uqturghan idi. tunis armiye qisimliri buningdin kéyin, parlamént bashliqi we naxda partiyesining rehbiri rashid elgannushini parlaméntqa kirgüzmigen idi.

pirézidént qayis seidning qararidin kéyin, xelqni tinchliq bilen küresh qilishqa chaqirghan gannushi, qanuniy asasi bolmighan bu qedemni «herbiy özgirish» dep atighan idi.