yawropa ittipaqi sayahet cheklimiliri qoyulghan döletler tizimlikini yéngilidi

türkiye awazi radiyosi xewiri: yawropa ittipaqi kéngishining bayanatigha asaslanghanda, cheklimilerdin xaliy tutush mumkinchiliki bar döletler tizimlikige ukraina qoshulghan bolsa, uzun waqittin buyan tizimlikte turghan tayland bilen riwanda chiqirilghan.

hazir tizimlikte ukrainadin bashqa, albaniye, erméniye, ezerbeyjan, awstiraliye, bosniye-gértségowina, biruni, kanada, isirailiye, iyordaniye, yaponiye, liwan, qaratagh, yéngi zélandiye, qatar, moldawiye, shimaliy makédoniye, seudi erebistan, sérbiye, singapor, jenubiy koréye, kosowu, amérika, teywen, xongkong, makaw (awmén) qatarliq dölet we rayonlar bar. buningdin bashqa, yawropa ittipaqi döletlirining puqralirigha sayahet ruxsiti bérilgen ehwalda, xitayghimu chégralar ochuq bolidu.

yawropa ittipaqining tizimliki, eza döletler üchün tewsiye xususiyitige ige, emma mejburlash küchi yoq. tizimliktiki döletlerdin yawropa ittipaqigha sayahet ruxsiti bérilidu, sayahetchilerge salametlik tekshürüsh we karantingha oxshash bezi tedbirlerni ijra qilishqa bolidu. tizimlikte bolmighan döletlerge qarita yawropa ittipaqi döletlirining sayahet cheklimiliri dawamlishidu.

yawropa ittipaqi ötken yili (2020) ning mart éyida wabaning tarqilishining aldini élish üchün 27 eza dölettin bashqa, shengen rayonigha tewe bolghan islandiye, lichténshtéyn, norwégiye we shiwéytsariye qatarliq döletlerge zörür bolmighan sayahetke bérishqa chek qoyushni qarar qilghan idi.