kanadadiki yerlik rehberler papagha naraziliq bildürdi
kanadada yataqliq chérkaw mektepliride jisniy parakendichilikke we zorawanliqqa uchrighan balilar mesiliside papa fransiskus (Franciscus) ning epu tilimigenliki, yerlik rehberlerning naraziliqini qozghidi.
türkiye awazi radiyosi xewiri: kanadada yataqliq chérkaw mektepliride jisniy parakendichilikke we zorawanliqqa uchrighan balilar mesiliside papa fransiskus (Franciscus) ning epu tilimigenliki, yerlik rehberlerning naraziliqini qozghidi.
«s t w niyus» (CTV News) ning xewiride bildrülishiche, papa fransiskus eneniwi yekshenbe duasi jeryanida, katolik chérkawining yataqliq mektepliridiki balilarni jinsiy parakende qilishqa munasiwetlik xewerlerdin biaram bolghanliqini bildürüp, yerlik xelqlerning heq-hoquqlirigha, medeniyetlirige hörmet qilishni chaqiriq qilghan. emma u, kanadaliqlar kütüwatqan «epu» ni tilimigen.
xewerde qarashlirigha orun bérilgen saskatchéwan (Saskatchewan) diki «igilik hoquqluq yerlik milletler fédératsiyesi» ning bashliqi babi kaméron (Bobby Cameron):
«hemmimiz azabliniwatimiz we qayghuruwatimiz. bu dunyada mesxire témisigha aylandi. papaning, ‹eyni waqitlarda, chérkawlirimizning yerlik xelqlerge we oqughuchilirigha qilghan muamilisi üchün intayin qayghurimen. epu tileymiz, dua qilimiz› déyishi shunchiwala tesmu?» dédi.
kamlups (Kamloops) hindiyanlar yataqliq chérkaw mektipidin qutulghan 72 yashliq sa xil tut (Saa Hiil Thut) mekteptiki chaghlirida béshidin ötkenlerge we tartqan azap-oqubetlirige héchkimning mesul bolmighanliqini bildürüp: «jinayetchiler bir shekilde asan qutulup qalidu. papa, ‹chérkawimizning yataqliq mektepliride minglarche jinsiy parakenchilik we zorawanliq weqelerning yüz bergenlikini anglidim. kamlupsta we kanadadiki her bir yataqliq mekteplerdiki namsiz mazarliqlarda 215 bala bar› démeydu» dédi.
may éyi (2021) ning axirida british kolumbiya (British Columbia) diki kamlups hindiyanlar yataqliq chérkawining baghchisida, tizimda yoq 215 balining jesitining qalduqliri tépilghan idi.
kanada bash ministiri jastin trudo (Justin Trudeau) ötken hepte tekrar élan qilghan bayanatida, mekteplerning chérkawning kontrolluqida ikenlikini xatirilitip, watikanning mekteplerdiki roli üchün jawabkarliqni üstige élishi we epu tilishi kéreklikini bildürgen idi.
