amérika-xitay heyetliri bir-birini eyiblidi

türkiye awazi radiyosi xewiri: amérika tashqi ishlar ministiri antoni blinkén uchrishishta qilghan sözide, xitay bilen béyjingning uyghur élide uyghurlargha, xongkong we teywenge qarshi ijra qiliwatqan siyasetlirini küntertipke qoydi.

u xitay bilen amérikaning özige xas siyasiy tüzümlirining barliqini bildürüp, shundaq bolsimu, ikki döletning kilimat özgirishi we yer shari iqtisadi mesililiride ortaq menpeetlirining barliqini éytti.

xitay kompartiyesi merkiziy komitéti siyasiy biyurosining ezasi, merkiziy tashqi ishlar xizmiti komitéti ishxanisining mudiri yang jyéchi amérikani xongkonggha munasiwetlik yolgha qoyghan émbargolar sewebidin tenqid qildi.

blinkén intérnét tor bixeterlik mesililirinimu yighinda küntertipke qoyidighanliqini éytishi bilen, yang jyéchi amérikaning intérnét tor xilapliq qilmishliri mesililiride dunyada aldida turidighanliqini eskertip: «bu mesilide bashqilarni eyibliyelmeysiler» dédi.

yang jyéchi amérikaning xitayni eyibleshlirige jawab qayturup, amérikani ima qilghan halda xitayning ishghallarni, tüzümlerni aghdurushni we bashqa döletlerning puqralirini qetli qilishni qobul qilalmaydighanliqlirini bildürdi.

yang jyéchi: «amérikaning aldi bilen obrazini yaxshilishi we démokratiyesini dunyagha éksport qilishtin waz kéchishi muhim. amérikada nurghun kishining amérikadiki démokratiyege bolghan ishenchi ajiz» dédi.

yang jyéchi amérikaning dunyawi meniwi qimmetlerni tilgha alghanliqini tenqid qilip: «meyli amérika bolsun, yaki gherb dunyasi bolsun, xelqaraliq jemiyetke wekillik qilmaydu» dédi.

amérika terepning yang jyéchining 18 minutluq sözi axirlashmastin muxbirlarni sirtqa chiqarmaqchi bolushi, talash-tartish qozghidi.

yang jyéchi muxbirlarning sirtqa chiqiriwétilishini tenqid qildi we buning özige qarshi adaletsizlik ikenlikini éytti.

amérika tashqi ishlar ministirliqi bu heqte heyetlerning ikki minuttin söz qilishi toghrisida kélishkenliklirini, emma xitay terepning buninggha boysunmighanliqini bildürdi.