parizhda üch teshkilat beshshar esed hakimiyiti üstidin erz qildi
firansiye paytexti parizhda üch ijtimaiy teshkilat 2013-yili süriyening sherqiy guta rayonida qilinghan ximiyelik hujumlarda «urush jinayiti» we «insaniyetke qarshi jinayet» ötküzülgenlikini bildürüp, beshshar esed hakimiyiti üstidin erz qildi.
türkiye awazi radiyosi xewiri: süriye médya we pikir erkinliki merkizi, ochuq jemiyet adalet herikiti we «süriye arxipi» namliq üch teshkilat birlikte yazma bayanat élan qilip, 2013-yili awghust éyida sherqiy guta rayonigha qilinghan ximiyelik hujumlar toghrisida nurghun delil-ispat, höjjet, fotograf we widéolarning toplanghanliqini bildürdi.
bayanatta, beshshar esed hakimiyiti «urush jinayiti» we «insaniyetke qarshi jinayet» ötküzgenliki sewebidin parizh edliye mehkimisige erz qilinghanliqi qeyt qilindi.
bayanatta, süriye arxipining diréktori hadi al xatibning süriye hakimiyitining ximiyelik qorallarni yasash we ishlitish mesiliside ochuq-ashkara bolmighanliqini, shunga beshshar esed hakimiyitining bu hujumlargha mesul bolushi kéreklikini tekitligenliki bildürüldi.
bayanatta, süriye médya we pikir erkinliki merkizining diréktori mazen derwishning her qaysi döletlerning beshshar esed hakimiyitining sotqa tartilishi üchün xelqaraliq sot qurushi kéreklikini telep qilghanliqi eskertildi.
mezkur üch teshkilat 2020-yili öktebirdimu beshshar esed hakimiyitining ximiyelik qoral ishletkenlikini seweb qilip, gérmaniyening karlsruhé (Karlsruhe) fédératsiye teptish mehkimisigimu erz qilghan idi.
beshshar esed hakimiyiti 2013-yili 21-awghust sherqiy guta rayonigha qilghan ximiyelik hujumda, 1400 din artuq puqra jénidin ayrilghan idi.
