дунйадики әң чоң зәһәрлик чекимлик тәшкилати каттивешиниң айали қолға елинди
«ел чапо» ләқәмлик мексикалиқ зәһәрлик чекимлик падишаһи җовкуин гузманниң айали емма коронел айспоро американиң виргинийә иштатида хәлқара зәһәрлик чекимлик әткәсчилики билән әйиблинип қолға елинди.
түркийә авази радийоси хәвири: америка әдлийә министирлиқиниң байанатиға асасланғанда, икки йил илгири «ел чапо» ниң сотиға даим дегүдәк қатнишип келиватқан емма коронел айспоро, бүгүн виргинийә иштатиниң дуллес хәлқара айродорумида қолға елинған болуп, сәйшәнбә күни вашингтонда сот қилинидикән.
айспоро хироин, кокайин вә метафетамин қатарлиқ зәһәрлик чекимликләрни америкиға йөткәш билән әйибләнмәктә.
әйни чағда форбес милйардерлар тизимликидинму орун алған вә узундин буйан издәп тутуш буйриқи чиқирилған йолдиши гузман 2001-йили мексика түрмисидин кир кейимләр йөткәйдиған аптомобилға йошурунуп қечип кәткән иди.
2001- вә 2015-йиллиридиму мексикадики бихәтәрлик тәдбирлири әң йуқири икки түрмидин қечип чиққандин кейин, гузман 2016-йили 1-айда йәнә тутулуп, америкиға қайтурулған иди.
дунйадики әң чоң зәһәрлик чекимлик тәшкилатиниң каттивеши дәпму әйибләнгән ел чапо 2019-йили 7-айниң 17-күни америкиниң нйу йорк иштатида ечилған сотта муддәтсиз қамақ җазасиға һөкүм қилинған иди.
