shimaliy atlantik ehdi teshkilati rusiye öktichisi nawalniyning qoyup bérilishini telep qildi

türkiye awazi radiyosi xewiri: stolténbérg ukraina bash ministiri dénis shimigal bilen shimaliy atlantik ehdi teshkilatining bash ishtabida körüshkendin kéyin ötküzülgen muxbirlarni kütüwélish yighinida, rusiye öktichisi alékséy nawalniyning qoyup bérilishi üchün élip bérilghan namayishni rusiye bixeterlik qisimlirining basturushqa urunghanliqini, pikir we namayish erkinlikini bésim astigha alghanliqlirini éytti.

stolténbérg: «rusiye miqyasidiki tinch namayishchilarning zorawanliq bilen basturulishini we minglighan kishining hemde  zhurnalistlarning xalighanche nazaretke élinishini qattiq eyibleymen. pikir erkinliki we tinch namayishqa hörmet qilish kérek. buningdin bashqa yene, alékséy nawalniyning siyasiy meqsetlik nezerbent qilinishi we qolgha élinishini eyibleymen. nawalniyning derhal qoyup bérilishini telep qilghan chaqiriqlargha awaz qoshimen» dédi.

nawalniyning bir suyiqest qurbani ikenlikini, emma edliyening burmilash arqiliq uni hujum nishangha aylandurghanliqini tekitligen stolténbérg, rusiyening kishilik hoquq we asasiy heq - hoquqqa hörmet qilish qatarliq xelqaraliq mejburiyetlirini ada qilishini telep qildi.

stolténbérg nawalniygha qilinghan zeherlesh suyiqestining jawabkarlirining rusiye teripidin sotqa chiqirilishi kéreklikini telep qilip, suyiqestke alqidar  terepsiz tekshürüsh élip bérish üchün rusiye dairilirining ximiyelik qorallarni cheklesh teshkilati bilen hemkarlishishi kéreklikini tekitlidi.

stolténbérg rusiyening herbiy mewjutluqini yéqindin közitiwatqanliqini, bu ishlarning soghuq munasiwetler urushidin buyan shimaliy atlantik ehdi teshkilatining qara déngiz we baltiq déngizi qatarliq jaylarda eng chong kolléktip mudapie küchini kücheytishige seweb bolghanliqini shundaqla shimaliy atlantik ehdi teshkilatigha eza döletlerning mudapie chiqimini ashurghanliqini éytti.