кеңәш палатаси тик ток қанун лайиһәсини мақуллиди

түркийә авази радийоси хәвири: америка кеңәш палатасиниң җумһурийәтчи әзаси җош хавлей (Josh Hawley) ниң башчилиқида түнүгүн (2020-йили 6-авғуст) палата омумий кеңишигә сунулған қанун лайиһәси мақулланди.

палатаниң барлиқ әзалири қанун лайиһәсини қоллап аваз бәрди. аваз бирлики билән мақулланған қанун лайиһәси федератсийә һөкүмәт хизмәтчилириниң йанфониға тик токни қачилашни чәкләйду.

палатаниң җумһурийәтчи әзаси җош хавлей қанун лайиһәси мақулланғандин кейин байанат елан қилип: «тик ток дөләт хәвпсизликигә чоң тәһдит. һөкүмәт телефонлирида орун йоқ» деди.

америка пирезиденти трамп америкалиқларниң йаки идарә-органларниң хитай ширкәтлириниң иҗтимаий таратқу йумтали тик ток вә үндидар (вичәт) билән һәр қандақ иш қилишни чәкләшкә мунасивәтлик икки пәрманни имзалиди.

һәр икки йумтал үчүн айрим елан қилинған пәрманларда, хитай ширкәтлири тәрипидин ишләпчиқирилған йанфон йумталлириниң америкада тарқилишиниң, дөләт хәвпсизликигә, ташқи сийаситигә вә иқтисадиға давамлиқ тәһдит селиватқанлиқи тәкитләнди.

пәрманларда йәнә, американиң тик ток вә үндидар ширкәтлиригә қарши дөләт хәвпсизликини қоғдаш үчүн дәриҗидин ташқири қаттиқ тәдбирләрни йолға қойуши керәклики әскәртилди.

америкада киши йаки идарә-органларниң тик ток вә вичәт билән һәр қандақ иш қилишиниң алдини елиш тәклип қилинған пәрманларниң 45 күн ичидә иҗра қилинидиғанлиқи қәйт қилинди.

пирезидент трамп 2020-йили 3-авғуст байанат елан қилип, тик токниң америкадики тармиқи америка ширкитигә сетилмиған тәқдирдә, 15-сентәбир тик токниң чәклинидиғанлиқини билдүргән иди.

у хәвпсизлик әндишәлири сәвәбидин тик токниң хитайниң контроллуқи астида болушини халимайдиғанлиқлирини әскәртип, микрософт йаки буниңға охшаш американиң бир чоң ширкитиниң тик токниң америкадики тармиқи болуши керәкликини тәкитлигән иди.