xitay bir qisim amérika emeldarlirigha wiza cheklimisi qoyidighanliqini jakarlidi

türkiye awazi radiyosi xewiri: xitay tashqi ishlar ministirliqi amérikaning xongkong alahide memuriy rayonigha munasiwetlik mesililirige «nachar köz qarashta bolghan» amérika emeldarlirigha wiza cheklimisi qoyidighanliqini élan qildi.

ministirliqning bayanatchisi jaw lijyen paytext béyjingda ötküzülgen qerellik muxbirlarni kütüwélish yighinida, amérikaning «xongkongning aptonomiyelik qurulmisigha ziyan yetküzgen we kishilik hoquqini depsende qilghan» xitay kommunistik partiyesining emeldarliri we ularning aile-tawabiatlirigha wiza chekliimisi yolgha qoyghanliqi üstide toxtaldi.

jaw: «xongkong bixeterlik qanuni mesilisi xitayning ichki ishidur, her qandaq chet ellikning arilishish hoquqi yoq» dédi hemde xitayning  dölet igilik hoquqi, bixeterlik we tereqqiyat menpeetliri bilen «bir dölette ikki xil tüzüm siyasiti» ni qetiy qoghdaydighanliqini éytti.

bayanatchi jaw washington hökümitining «saxta émbargo» arqiliq xitayning xongkong dölet bixeterlik qanunini tosushqa urunushining muweppeqiyetlik bolmaydighanliqini ilgiri sürüp: «xitay hökümiti amérikaning natoghra heriketliri toghrisida xongkonggha munasiwetlik mesililerge ‹nachar köz qarashta bolghan› amérika mesullirigha wiza cheklimisi qoyushni qarar qildi» dédi.

amérika tashqi ishlar ministiri mayk pompéyo 26 - iyunda xongkongning aptonomiyelik qurulmisigha buzghunchiliq qilghan we kishilik hoquq depsendichiliki bilen chétishliqi bolghan xitay kommunistik partiyesi emeldarliri we ularning aile-tawabiatlirigha wiza cheklimisini yolgha qoyghanliqlirini élan qilip: «bügün men 1984 - yildiki xitay - engliye ortaq xitabnamiside kapaletke ige qilinghan xongkongning yuqiri derijilik aptonomiyesige ziyankeshlik qilghan yaki kishilik hoquq depsendichilikide jawabkarliqi bar, dep qaralghan mewjut shundaqla sabiq ch k p emeldarlirigha wiza cheklimisi qoyghanliqimizni jakarlaymen. bu cheklime mezkur emeldarlarning aile-tawabiatlirinimu öz ichige alidu. xitay choqum xitay - engliye ortaq xitabnamisida belgilengen wedilirige emel qilishi lazim» dégen idi.