dunya sehiye teshkilati firansuz doxturlarning waksina siniqi heqqidiki sözlirini qattiq eyiblidi

türkiye awazi radiyosi xewiri: dunya sehiye teshkilati bash diréktori tédros adanom gébréyus, wuxen wirusi (yéngi tiptiki tajsiman wirusluq öpke yallughi yuqumi – kowid – 19) gha qarshi yasilidighan waksina we dorilarning «afriqida sinaq qilinishi kérekliki» ni éytqan fransiyelik ikki doxturning sözlirige «irqchi, nomus qilarliq, qorqunchluq we mustemlike dewrining qalduqliri» dep baha berdi.

gébréyus dunya sehiye teshkilatining shiwitsariyening jenwe shehiridiki bash orginida ötküzülgen sin körünüshlük muxbirlarni kütüwélish yighinida söz qilip, gerche kowid - 19 toghrisidiki tunji qétimliq doklat bérish yighinining ötküzülginige 100 künge yetmigen waqit bolghan bolsimu, waksina tetqiqatining intayin téz ilgiriligenlikini éytti.

u, 20 etrapida institut we shirketning waksina ishlepchiqirish üchün japaliq tirishchanliq körsitiwatqanliqini tekitlep,  «dunya sehiye teshkilatining yasilidighan dora we waksinalarning barliq döletler we insanlar arisida teng – barawer tarqitilishigha kapaletlik qilish iradisi qetiydur» dédi.

bezi firansuz doxturlarning kowid – 19 waksinasini afriqada sinaq qilishqa bolidighanliqi toghrisidiki sözlirini eslitip ötken gébréyus, ««rastini éytsam, men bek qorqup kettim. men hemkarlishishqa mohtaj ikenlikimizni dewatqan bir peytte, bu xil <irqchi sözler> hemkarliq ornitishqa qarshi chiqishtur» dédi.

«afriqa héchqandaq waksinining sinaq meydani qilishqa bolmaydu» dégen gébréyus, kowid - 19 waksinisini sinaq qilish mesilsiide, meyli afriqa yaki yawropa bolsun, ayrimchiliq qilmastin oxshash belgilime boyiche yol tutidighanliqlirini éytti.

u, firansuz doxturlarning sözlirige «nomus qilarliq» we «qorqunchluq» dep baha bérip, «eger bir jayda sinaq qilishqa toghra kelse, kishilerge barawer muamile qilinishi kérek. mustemlikichilik rohiy halitining qalduqliri emdilikte  toxtitishi kérek. dunya sehiye teshkilati bu ishning yüz bérishige yol qoymaydu. 21- esirde ilim ehlilirining bundaq sözlirini anglash nomus we qorqunchluq ehwaldur. biz bu bayanatlarni qattiq eyibleymiz» dégenlerni qeyt qildi.