ۋۇخەن ۋىرۇسىدىن يۇقۇملانغان بىر ئايالنىڭ بوۋىقىنىڭ ساغلام تۇغۇلغانلىقى بىلدۈرۈلدى

تۈركىيە ئاۋازى رادىيوسى خەۋىرى: جەنۇبىي قىبرىس رىم تاراتقۇلىرىنىڭ خەۋەر قىلىشىچە، كوۋىد – 19 يۇقۇمى بايقالغان بىر ھامىلدار ئايال 31 مارتتا تۇغقان؛ دوختۇرلار 3 يېرىم كىلوگىرام ئېغىرلىقتىكى ئوغۇل بوۋاقنىڭ سالامەتلىك ياخشى ئىكەنلىكىنى، تەكشۈرۈشلەر نەتىجىسىدە بوۋاقنىڭ يۇقۇملانمىغانلىقىنى ئۇقتۇرغان.

دوختۇرخانا مەسئۇللىرى، نۇقتىلىق ھالدا كۆزىتىلىۋاتقان بوۋاقنىڭ بىر ھەپتە ئىچىدە قايتىدىن تەكشۈرۈلۈپ، يۇقۇم ئالامىتى كۆرۈلمىسە بالنىستتىن چىقىرىلىدىغانلىقىنى بىلدۈردى.

دائىرىلەر، ئانىسىنىڭ كوۋىد - 19 دىن يۇقۇملانغان بولۇشىغا قارىماي، ھېچقانداق يۇقۇم كېسەللىك ئالامىتى كۆرۈلمىگەن بوۋاقنىڭ سىنىقىنىڭ مەنپىي چىققانلىقىنى، 3 – ئاپرېل (بۈگۈن) دا يەنە بىر قېتىم تەكشۈرۈلىدىغانلىقىنى تەكىتلىدى.

دوختۇرلار، ئەگەر ئىككىنچى قېتىملىق سىناقتىمۇ يۇقۇم ئالامىتى كۆرۈلمىسە، ئانىنىڭ بوۋاقنىڭ بىلەن ئۇچرىشىشىغا رۇخسەت قىلىنىدىغانلىقىنى ئەسكەرتتى.