gherbtiki wuxen wirusigha munasiwetlik yéngi melumatlar
italiyede wuxen wirusi (Kovid-19) sewebidin jénidin ayrilghanlarning sani 34 ke chiqti.
türkiye awazi radiyosi xewiri: italiyede 21-féwral (2020) körülüshke bashlighan wuxen wirusigha munasiwetlik weqeler, téz sürette tarqilishqa we jangha zamin bolushni dawam qilmaqta.
xelq mudapie bash mudiri angélo borrélli (Angelo Borrelli) paytext rimda axbarat élan qilip, wuxen wirusi bilen yuqumlanghanlar sanining 1577 ge, ölgenler sanining 34 ke chiqqanliqini bildürdi.
u 140 kishining jiddiy dawaliniwatqanliqini, 83 kishining dawalinip yaxshilanghanliqinimu qeyt qildi.
italiyening lombardiya ishtatidiki mektepler 8-martqiche qoyup bérildi. milanodiki dunyagha dangliq skala (Scala) opérasi bir hepte taqaldi.
amérika hawa yolliri shirkiti wuxen wirusigha munasiwetlik weqeler köp körülgen milanogha bolghan ayropilan seperlirini 2020-yili 24-aprélghiche toxtatqanliqini élan qildi. shirketning mezkur qarari, 29-féwral «AA198» nomurluq niyu york-milano sepirini qilidighan ayropilan xadimlirining ret qilishidin kéyin chiqirildi.
amérikada wuxen wirusi sewebidin jénidin ayrilghanlarning sani ikkige chiqti.
yéngi melumatlargha asaslanghanda, gérmaniyede wirus bilen yuqumlanghanlar sani 129, firansiyede yuqumlanghanlarning sani 100, ispaniyede 74, engliyede 35, shiwétsiyede 22, shiwéytsariyede 35, awstiriyede 14, gollandiyede 10, girétsiyede yette, bélgiyede ikki bolghan.
chéxiye sehiye ministiri adam wojiték (Adam Vojtech) üch kishining wuxen wirusi bilen yuqumlanghanliqini élan qildi.
dominika jumhuriyitimu 22-féwral kelgen 62 yashliq italiyelik bir kishide, wuxen wirusining bayqalghanliqini élan qildi.
latin amérika qitesidiki döletlerde wuxen wirusigha munasiwetlik weqe birinchi bolup biraziliyede, arqidin méksika we ékwadorda körüldi.
dunya sehiye teshkilati xitayning wuxen shehiride 2019-yili 12-dékabir bayqalghan wuxen wirusining qisqa waqit ichidila bashqa sheher, rayon we döletlerge tarqilishi bilen «jiddiy halet» élan qilghan idi.
dunya sehiye teshkilati wuxen wirusining dunya xaraktérlik xeter sewiyesini «yuqiri» din «intayin yuqiri» gha chiqarghan idi.
