hindonéziye xitaygha ultimatom tapshurdi
hindonéziye, jenubiy xitay déngizidiki natuna taqim arallirida xitay béliqchi kémiliri we déngiz qirghiqi mudapie etriti xadimlirining dölet déngiz tewelikige dexli qilishigha naraziliq bildürüp, béyjing hökümitige ultimatom tapshurdi.
türkiye awazi radiyosi xewiri: hindonéziye tashqi ishlar ministirliqining bayanatigha qarighanda, ministirliqqa chaqirtilghan xitayning jakartada turushluq bash elchisi shyaw chiéngha, xitayning natuna taqim aralliridiki hindonéziyening alahide iqtisadiy rayonida sadir qilghan qanunsiz heriketliri sewebidin ultimatom tapshurulghan.
hindonéziyening, xitayning 2009 – yili 9 késik siziqliq xeritige asasen birleshken döletler teshkilati (b d t) gha sunghan jenubiy xitay déngizida heqqi barliqi toghrisidiki dewasini qetiy étirap qilmaydighanliqi tekitlengen bayanatta, xitayning atalmish igilik hoquqliriningmu b d t déngiz qanuni ehdinamsige xilap ikenliki tilgha élip ötüldi.
yene bir tereptin, xitay bash ministiri li kéchyang ötken ay chaqirilghan 22 – nöwetlik xitay – sherqiy jenubiy asiya döletliri ittipaqi bashliqlar yighini dairiside, jenubiy xitay déngizida uzun muddetlik tinchliq we muqimliqning kapaletke ige qilinishi üchün dölitining jenubiy asiya döletliri bilen hemkarliship xizmet qilishqa teyyar ikenlikini bildürgenidi.
qirghaqliri filippin, wiyétnam, malayshiya, brunéy we hindonéziyege tutishidighan jenubiy xitay déngizida chong – kichik bolup yüzlerche aralche, qiyaliq we taqir jaylar bar. rayon döletliri belgilik jaylarni özining «alahide iqtisadiy rayon» dep békitip, jenubiy xitay déngizining mol yer asti we béliqchiliq menbelirini chégrasi tewelikige kirgüzüshke urunmaqta.
