xongkong saqchiliri tebiiy pen uniwérsitétidiki qorshawni bügün axirlashturdi
saqchilar uniwérsitétqa bésip kirip teshkürüsh jeryanida héchqandaq qarshiliqqa uchrimighanliqini éytti.
türkiye awazi radiyosi xewiri: xitayning xongkong alahide memuriy rayonidiki tebiiy pen uniwérsitétida saqchilar 12 kündin buyan dawamlashturuwatqan qorshawini bügün (29-noyabir) axirilashturdi.
saqchi qisimliri bügün chüshtin bürün uniwérsitét binasi etrapidiki tosuqlirini élip tashlidi.
saqchi idarisi muawin bashliqi chow yatming tünügün namayishchilar chédir qurghan uniwérsitétqa saqchilar kirip, partlatquch maddilar we xeterlik buyumlarni tazilash xizmetlirini tamamlighanliqini bildürdi.
chow yatming saqchilar uniwérsitétni tekshürüsh jeryanida héchqandaq qarshiliqqa uchrimighanliqini we nazaretke alidighan ishlarningmu bolmighanliqini bildürdi hemde saqchilarning chüshlük tamaqtin burun uniwérsitét binasining kontrolluqini mektep mudirliqigha tapshuridighanliqini élan qildi.
saqchilar uniwérsitétta 2 kün dawamlashqan tekshürüshler jeryanida, namayshichilar tashlap chiqip ketken 4 ming 80 dane molutuf (bénzin qachilanghan shishe), 921 dane gaz qutusi, kislata we bashqa ximiyelik maddilarni tapqanliqini hemde 588 shéshiningmu qolgha chüshürülgenlikini qeyt qildi.
uniwérsitét binasi ichidiki aptomobil toxtitish ornida 44 aptomobilning ziyangha uchrighanliqimu bildürüldi.
saqchilar tebiiy pen uniwérsitétini 17 – noyabirda qorshawgha élip bügüngiche namayishchilarni qorshawda tutushni dawamlashturghan bolup, qorshaw jeryanida 1100 namayishchi uniwérsitét binasidin sirtqa chiqirilip, ulardin 800 kishi qamaqqa élinghan we qalghan 300 namayishchi 18 yashtin kichik ikenliki éniqlanghandin kéyin qoyup bérilgen idi.
uniwérsitét binasi ichide texminen 100 ge yéqin namayishchining namayishlirini dawmlashturuwatqanliqi texmin qilinghan idi.
bulardin bezilerning tuydurmastin uniwérsitét binasidin chiqip ketkenliki ilgiri sürüldi.
tünügün (28-noyabir) saqchilar uniwérsitét binasigha bésip kirishtin bir qanche saet ilgiri yüzige maska taqiwalghan bir namayishchi yoshurunghan yéridin chiqip, axbaratchilargha binada 20 din az kishining qalghanliqini éytqan idi.
