afghansitanda saylam awazliri qayta sanilidu
afghanistan musteqil saylam komitéti 2019-yili 28-séntebir ötküzülgen pirézidéntliq saylimining netijiliri élan qilinishqa qisqa waqit qalghanda, 8 ming 225 saylam merkizide awazlarning qayta sanilishini qarar qildi.
türkiye awazi radiyosi xewiri: afghanistan musteqil saylam komitétining bayanatchisi zabihullah sadat anadolu agéntliqigha bergen bayanatida, saylam komitéti ezalirining qarari bilen, dölet miqyasidiki köpligen saylam merkizining awazlirining qaytidin sanilidighanliqini éytti.
u netijilerning ochuq-ashkara élan qilinishi üchün awazlarning qaytidin sanilishi kéreklikini eskertip, awaz sanash musapiside barliq namzatlarning we nazaretchilerning awaz sanash merkizide bolushini telep qildi.
awazlarning qaytidin sanilishigha barliq namzatlar qarshi chiqqan bolsimu, emma hakimiyettiki pirézidént namzati eshref ghéni awazlarning qaytidin sanilishini qollidi.
afghanistan ijraiye kéngishining bashliqi we pirézidént namzati abdullah abdullah awazlarning qaytidin sanilishini xalimaydighanliqini élan qildi.
awaz sanash emeldin qaldurulmighan teqdirde chiqqan netijilerni qobul qilmaydighanliqlirini bildürgen abdullah abdullah, saylam komitétining xelqning iradisi bilen oynashmasliqi kéreklikini tekitlidi.
abdullah abdullah awazlarni qaytidin sanash bahanisi bilen saxtipezlik qilinghan awazlarni küchke ige qilishqa qetiy ruxset qilmaydighanliqlirini eskertti. u namzatlar közetküchi ewetmigen awaz sanashtin chiqidighan netijini héchkimning qobul qilmaydighanliqini sözlirige ilawe qildi.
yene bir tereptin, pirézidént namzatliridin gülbeddin hikmetyar bilen rehmetullah nebilmu bayanat élan qilip, awazlarni qaytidin sanashqa qarshi ikenliklirini bildürdi.
