alte dölet süriye asasiy qanun komitétini qollidi
amérika, engliye, seudi erebistan, misir, gérmaniye we iyordaniyening tashqi ishlar ministirliri süriye asasiy qanun komitétining shiwéytsariye paytexti jenwe shehiride muzakire bashlighanliqidin memnun ikenliklirini élan qildi.
türkiye awazi radiyosi xewiri: amérika tashqi ishlar ministirliqi alte dölet tashqi ishlar ministirlirining ortaq yazma bayanat élan qilip, süriye asasiy qanun komitétini qollighanliqini bildürdi.
bayanatta, b d t bash katipi antoniyo gutérs bilen b d t süriye alahide wekili géyir pédérsén (Geir Pedersen) ning, süriye süriye mesiliside körsitiwatqan tirishchanliqlirining qizghin qarshi élinidighanliqi eskertildi. bayanatta mundaq déyildi:
«b d t nazariti astida süriyede erkin we adil saylamlarning ötküzülüshige imaniyet yaritip béridighan bixeter we biterep muhitni berpa qilish tirishchanliqlirini qollaymiz. b d t xewpsizlik kéngishining 2254-nomurluq qararini ijra qilish kérek.»
bayanatta yene, idlibte uzun muddetlik urush toxtitishni kapaletke ige qilish chaqiriq qilinish bilen birge: «süriye kirizisini herbiy yoldin hel qilish mumkin emes. peqet b d t xewpsizlik kéngishining 2254-nomurluq qarari ramkisida siyasiy jehettin hel qilish charisi tépish mumkin» déyildi.
süriyening yéngi asasiy qanunini tüzidighan asasiy qanun komitétining ezaliri, b d t nazariti astida ikkinchi qétim bir yerge toplandi. komitétning birinchi yighini charshenbe küni (2019-yili 30-öktebir) b d t ning jenwediki ishxanisida échildi.
