seudi erebistan tashqi ishlar we qatnash ministirliri wezipisidin qalduruldi

türkiye awazi radiyosi xewiri: seudi erebistan s p a (SPA) agéntliqining xewiride körsitilishiche, tashqi ishlar ministirliqi wezipisige faysal bin ferhan bin abdullah al suud, qatnash ministirliqi wezipisige salih bin nasir eljasir qoyulghan.

faysal bin ferhan 2019-yili féwral éyidin tartip seudi erebistanning bérlindiki bash elchisi bolup wezipe ötewatqan idi. salih bin nasir eljasir seudi erebistan hawa yolliri shirkitining mudiri idi.

seudi erebistanliq zhurnalist jemal qashiqchi 2018-yili 2-öktebir istanbuldiki seudi erebistan konsulxanisida öltürülüp uzun ötmeyla tashqi ishlar ministiri adil eljubeyr wezipisidin élinghan bolup, uning ornigha ibrahim elassaf wezipige qoyulghan idi.

yéngi tashqi ishlar ministiri faysal bin ferhan bin abdullah al suud weliehdi shahzade muhemmed bin selmangha yéqinliqi we irangha qarshi élan qilghan bayanatliri bilen tonulidu.

gérmaniyediki ijtimaiy teshkilatlar buningdin sekkiz ay burun faysal bin ferhan bin abdullah al suudning zhurnalist jemal qashiqchi jinayitide qoli barliqini ilgiri sürüp, bérlin bash elchilik wezipisige qoyulmasliqi üchün, seperwerlik herikiti bashlighanliqini élan qilghan idi.

ottura sherqte tetqiqat ishliri bilen shughullinidighan «Euroscope» idarisimu oxshash mezgilde élan qilghan bayanatida, nurghun teshkilatlarning gérmaniye pirézidénti frank woltér stéyinméyir (Frank-Walter Steinmeier) din faysal bin ferhan bin abdullah al suud bash elchilik wezipisige qoyulushqa tosqunluq qilishni telep qilghanliqini bildürgen idi.