riyad: aramkogha étilghan bombilarning iranda yasalghanliqigha qanaet hasil qilduq
seudi erebistanning tashqi ishlargha mesul dölet ishliri ministiri adil eljubeyr, londondiki chatam hawus namliq istratégiye merkizide söz qildi.
türkiye awazi radiyosi xewiri: seudi erebistanning tashqi ishlargha mesul dölet ishliri ministiri adil eljubeyr, riyadning, dölet igilikidiki néfit shirkiti – saudi aramkoning néfit chekkilesh orunlirigha qilinghan hujumlarda ishlitilgen bashqurulidighan bombilarning iranda ishlengenlikini delilligenlikini we pütün rayongha nisbeten weyran qilghuch aqiwetlerni élip kélidighan bir urushni xalimisimu, izchil halda hujumgha duchar bolup turuwérelmeydighanliqini éytti.
adil eljubeyr londondiki chatam hawus namliq istratégiye merkizide söz qilip, «(aramko hujumida ishlitilgen) bashqurulidighan bombilarning iranda ishlengenlikige dair qanaet küchlük, biz qayil bolduq. bu bashqurulidighan bombilarning jenubtin emes, shimaldin kelgenlikige qayil bolduq. jenubtin kélishi üchün musape yéterlik emes» dédi we sözini dawamlashturup, «birleshken döletler teshkilati (b d t)din tekshürüshte bizge yardemchi bolushi üchün mutexessis telep qilduq we bashqa bir qatar döletlerdin kelgen mutexessisler tekshürüshke qatnashti. héchbir shübhige orun qaldurmighudek derijide bu bombilarning qeyerdin qoyup bérilgenlikini éniqlap chiqishni xalaymiz» dégenlerni qeyt qildi.
tekshürüsh dawamlishiwatqan bu musapide barliq tallash yollirigha teyyar halette turuwatqanliqlirini, engliyeni öz ichige alghan ittipaqdash döletler bilen bu heqte pikir almashturghanliqlirini bildürgen jubeyr, «urush qilishni xalimaymiz, chünki urush pütkül rayongha nisbeten weyran qilghuch aqiwetlerni élip kélidu. biraq, mushundaq olturup iranliqlarning yaki wekillirining hujumlirigha izchil duchar boliwermeymiz» dédi.
u, engliye, firansiye we gérmaniyedin teshkil tapqan 3 döletning ötken ay jamaetchilikke ashkara halda aramko hujumlirining jawabkarining iran ikenlikini otturigha qoyushining muhim bir qedem hésablinidighanliqini tekitlidi.
seudi erebistanning dölet igilikidiki néfit shirkiti – saudi aramkoning ikki néfit chekkilesh ornining 14 – séntebirde shu jay waqti saet 04:00 te qoralliq uchquchisiz hawa apparatlirining hujumigha uchrighanliqi, weqedin kéyin ot apiti yüz bergenliki bildürülgenidi.
yemendiki husiylar, adem ölüsh yaki yarilinish körülmigen mezkur weqeni 10 dane qoralliq uchquchisiz hawa apparati bilen özlirining sadir qilghanliqini ilgiri sürgenidi.
dunyaning eng chong néfit éksportchisi bolghan seudi erebistanning néfit orunlirigha qilinghan hujum tüpeyli, döletning néfit ishlepchiqirishida kündilik 5 milyon 700 ming waril qisqirash bolghanliqi qeyt qilinghanidi.
