riyad, aramko hujumidin intiqam élish pilanlirining arisida herbiy charilerningmu barliqini bildürdi

türkiye awazi radiyosi xewiri: seudi erebistanning tashqi ishlargha mesul dölet ishliri ministiri adil eljubeyr, seudi erebistanning dölet igilikidiki néfit shirkiti – saudi aramkoning néfit chekkilesh orunlirigha qilinghan hujumlardin herbiy charilerni qollinip intiqam élishining éhtimaldin yiraq emeslikini bildürdi.

birleshken döletler teshkilati (b d t) ning 74 – nöwetlik omumi kéngishi bashliqlar yighinigha ishtirak qilish üchün nyu yorkqa barghan jubeyr muxbirlarni kütüwélish yighini ötküzüp, dölitining achquchluq ehmiyetke ige néfit guruhi aramkoning ikki muessesesige hujum qilinghan orunni éniqlash xizmetlirining dawamlishiwatqanliqini bildürgen halda, «aramko hujumlirigha dair tekshürüshning netijisi élan qilinghandin kéyin, diplomatik, iqtisadiy we herbiy jehettiki barliq  charilerni mueyyenleshtürimiz» dédi.

hujumda ishlitilgen qorallarning iranda yasalghanliqini, shunga téhranning aramko hujumlirining jawabkari ikenlikini tekitligen jubeyr, dölitining pütün küchi bilen  urushtin saqlinish iradisining küchlük ikenlikini, biraq, iranning tehditliri aldida qol qowushturup qarap turmaydighanliqini qeyt qildi.

seudi erebistanning dölet igilikidiki néfit shirkiti – saudi aramkoning ikki néfit chekkilesh ornida, ötken shenbe küni shu jay waqti saet 04:00 te qoralliq uchquchisiz hawa apparatlirining hujumigha uchrap ot apiti yüz bergenliki bildürülgen؛ adem ölüsh yaki yarilinish ehwali körülmigen hujumning jawabkarliqini yemendiki husiylar üstige alghanidi.

iranning hizbullah we husiylarni ballistik bashqurulidighan bomba bilen teminligenlikige isharet qilghan jubeyr, téhranning rayonni muqimsizlashturush pozitsiyesige xatime bérishi kéreklikini tekitlidi.

u, amérika qoshma ishtatliri bilen birlikte iran mesilisini yéqindin küzitiwatqanliqlirini bildürüp, washington bilen, bedilining qandaq bolushidin qetiynezer, téhranning yadro qoraligha ige bolmasliqi mesiliside hempikir ikenliklirini tilgha élip ötti.

seudi erebistanning tashqi ishlargha mesul dölet ishliri ministiri adil eljubeyr yemen mesiliside heqqide toxtilip, dölitining rayonni muqimliqqa ige qilish we husiylar bilen irangha qarashliq qoralliq küchlerning kéngiyishining aldini élish üchün küresh qiliwatqanliqini éytti.

husiylarning barliq kélishimlerge xilapliq qilghanliqini we seudi erebistangha yüzlerche bomba atqanliqini bildürgen juyebir, husiylarning yemenge insaniy yardemlerning yetküzüp bérilishige tosqunluq qiliwatqanliqini sözlirige ilawe qildi.