üch dölet seudi néfit tesislirige qilinghan hujumgha iranning jawabkar ikenlikini bildürdi
firansiye, gérmaniye we engliye birlikte yazma bayanat élan qilip, seudi erebistanning néfit tesislirige qilinghan hujumgha iranning jawabkar ikenlikini bildürdi.
türkiye awazi radiyosi xewiri: amérikaning niyu york shehiride b d t 74-qétimliq omumiy kéngishi yighinigha qatnishiwatqan gérmaniye bash ministiri angéla mérkél, firansiye pirézidénti makron we engliye bash weziri boris jonson seudi erebistan néfit shirkiti aramko tesislirige qilinghan hujum toghrisida ortaq bayanat élan qildi.
bayanatta, «2019-yili 14-séntebir seudi erebistandiki néfit tesislirige qilinghan hujumni qattiq eyibleymiz. iranning bu hujumda jawabkarliqi barliqi nahayiti éniq. buning bashqa izahati yoq. téximu köp uchurgha érishish üchün élip bériliwatqan tekshürüshlerni qollaymiz» déyildi.
mezkur hujumlarning rayonda chong toqunushlarning yüz bérish xetirini peyda qilghanliqigha ima qilinghan bayanatta mundaq déyildi:
«bu hujumlar, dawamlashturghili bolidighan diplomatik tirishchanliqlarni we barliq tereplerni mesilige daxil qilish arqiliq rayonda jiddiychilikni peseytishning ehmiyitini yene bir qétim otturigha qoydi.»
bayanatta, üch döletning iran bilen tüzülgen yadro kélishimini qollaydighanliqi tekrarlandi we iran kélishim shertlirige qaytip kélishke teklip qilindi.
ottura sherqte jiddiychilikni peseytish chaqiriq qilinghan bayanatta, «iranni diyalog ornitishqa, ighwagerchiliklerdin we jiddiychilikni keskinleshtürüwétishtin yiraq turushqa teklip qilimiz» dégen ibarilerge orun ajritildi.
