iran seudi erebsitanning eyibleshlirini ret qildi
iran tashqi ishlar ministirliqi bayanatchisi abbas musewi, téhranning, seudi erebistanning dölet igilikidiki néfit shirkiti – saudi aramkoning néfit chekkilesh orunlirigha qilinghan hujumlarning jawabkari dep élan qilinishigha naraziliq bildürdi.
türkiye awazi radiyosi xewiri: bayanatchi abbas musewi tashqi ishlar ministirliqining tor bétide élan qilinghan yazma bayanatida, seudi erebistanning tashqi ishlargha mesul dölet ishliri ministiri adil eljubeyrning téhran dairilirige qaratqan eyibleshlirini tenqidlidi.
aramkogha qilinghan hujumlarning iran qoralliri bilen qilinishini ilgiri sürüp, téhran dairilirining buning jawabkari, dep qarilishigha «tutruqsiz» dep baha bergen musewi, bu eyibleshlerni ret qilidighanliqlirini qeyt qildi.
u, seudi erebistangha bashqilarni eyibleshning ornigha yemendiki urushqa xatime bérishni tewsiye qilip, «seudi erebistan iranni özining düshmini dep qarighanliqi üchün heqiqetlerdin qéchiwatidu. seudiylarning, iranning ismini tilgha élip turup, meghlubiyitige bashqilarni jawabkar qilip körsitishke urunushi epsuslinarliq ishtur» dédi.
seudi erebistanning tashqi ishlargha mesul dölet ishliri ministiri adil eljubeyr tünügün riyadta muxbirlarni kütüwélish yighini ötküzüp, «seudi erebistanning dölet igilikidiki néfit shirkiti – saudi aramkoning néfit chekkilesh orunlirigha qilinghan hujum iran qoralliri bilen qilindi. shunga hujumning jawabkari téhran dep qaraymiz» dégenidi.
seudi erebistanning dölet igilikidiki néfit shirkiti – saudi aramko qarmiqidiki ikki néfit chekkilesh ornida ötken shenbe küni shu jay waqti saet 04:00 te qoralliq uchquchisiz hawa apparati hujumigha uchrap ot apiti yüz bergenliki bildürülgenidi. yemendiki husiylar adem ölüsh yaki yarilinish ehwali körülmigen mezkur hujumni 10 qoralliq uchquchisiz hawa apparatini ishlitip özlirining sadir qilghanliqini ilgiri sürgenidi.
