iran pirézidénti we tashqi ishlar ministirigha amérika wizasi bérildi
iran tashqi ishlar ministiri jewad zarif amérikaning niyu york shehiride ötküzülidighan b d t omumiy kéngishining yighinlirigha qatnishidu.
türkiye awazi radiyosi xewiri: iran tashqi ishlar ministirliqining bayanatchisi abbas musawi taratqulardiki amérikaning iran pirézidénti hesen ruhani we tashqi ishlar ministiri jewad zarifqa, b d t omumiy kéngishi yighinlirigha qatnishishi üchün wiza bergenliki toghrisidiki xewerlerge qarita twittérda bayanat élan qilip, jewad zarifning bügün (20-séntebir) etigen niyu yorkqa qarap yolgha chiqqanliqini bildürdi.
ruhani we hemrahliqidiki heyetning wiza bérilmigen teqdirde, b d t omumiy kéngesh yighinlirigha qatnashmaydighanliqi élan qilinghan idi.
amérika maliye ministirliqi jewad zarifni iran diniy rehbiri ayetullah ali hamenéyning namida xizmet qilidighanliqini seweb körsitip, émbargo tizimlikige kirgüzgen idi.
émbargolar jewad zarifning amérikadiki mal-mülkini tonglitish, amérikaliqlarning iran tashqi ishlar ministiri jewad zarif bilen her qandaq soda munasiwiti ornitishni cheklesh we jewad zarifning amérikagha kélishini chekleshni öz ichige alidu.
b d t merkizige sahibxanliq qiliwatqan amérikaning, b d t yighinlirigha qatnishish üchün niyu yorkqa baridighan diplomatlargha wiza bérish mejburiyiti bar.
amérika 2019 -yili iyul éyida b d t ning bir yighinigha qatnashmaqchi bolghan iran tashqi ishlar ministiri jewad zarifqa, b d t binasi we iranning b d t diki daimi wekili ishxanisining sirtigha chiqmasliq sherti bilen wiza bergen idi.
amérika pirézidénti donald tramp b d t diki uchrishishlar jeryanida, iran pirézidénti hesen ruhani bilen körüshidighanliqi ilgiri sürülmekte.
