padishah selman: dölitimiz bu xil qorqunchaqlarche hujumlarning tesirini bir terep qilalaydu
seudi erebistan padishahi selman bin abduleziz al suud, dölitining, dölet igilikidiki néfit shirkiti – saudi aramkogha qarashliq orunlargha qilinghan «qorqunchaqlarche» hujumlarning tesirini yéngeligüdek qudretke ige ikenlikini éytti.
türkiye awazi radiyosi xewiri: seudi erebistan resmiy xewer agéntliqi – spaning xewer qilishiche, padishah selman seudi erebistan ichki kabinétida söz qilghanda, shenbe küni dölet igilikidiki néfit shirkiti – saudi aramko shirkitige qarashliq ikki néfit chekkilesh ornigha qoralliq uchquchisiz hawa apparatliri bilen qilinghan hujum heqqide toxtilip, «seudi erebistan buninggha oxshash qorqunchaqlarche hujumlarning tesirini bir terep qilalaydu» dégen.
padishah selman, dunyaning eng chong néfit shirkitige qarashliq ikki néfit chekkilesh zawutigha sélinghan «buzghunchiliq» ni eyibligenlerge yuqiri baha béridighanliqini bildürüp, «bu hujumlar peqet seudi erebistanning halqiliq ehmiyetke ige orunlirinila emes, dunya néfit bilen teminlesh sahelirigimu zerbe obéykti qilmaqta we dunya iqtisadining muqimliqigha xewp élip kelmekte» dégenlerni qeyt qilghan.
seudi erebistan padishahi selman, dölitining zéminlirini we hel qilghuch ehmiyetke ige orunlirini qoghdaydighanliqini bildürüp, kimning qilghan bolushidin qetiynezer hujumlargha inkas qayturush qudritige ige ikenliklirini tekitlep ötken.
padishah selman, xelqara jemiyetni rayongha, néfit bilen teminleshke we dunya iqtisadining bixeterlikige xewp yetküzüwatqan hujumlarning toxtitilishi üchün téximu jiddiy tedbirlerni yolgha qoyushqa chaqirdi.
