tramp: dölitimiz dunyaning eng ilghar qoral sistémisigha ige

türkiye awazi radiyosi xewiri: amérika qoshma ishtatliri pirézidénti donald tramp, seudi erebistanning dölet igilikidiki néfit shirkiti – saudi aramko qarmiqidiki ikki néfit chekkilesh ornigha qilinghan hujum toghrisida toxtilip, dölitining irangha qilghusi herbiy hujumining muwazinetlik bir inkas bolidighanliqini bildürdi.

donald tramp, nyu méksiko ishtatigha qarap yolgha chiqishtin ilgiri aqsarayning baghchisida muxbirlargha bayanat berdi؛ seudi erebistanning dölet igilikidiki néfit shirkiti – saudi aramkogha qarashliq orunlargha qilinghan hujumning arqisida iranning bar – yoqluqi mesiliside qisqa waqit ichide keskin netijige érishidighanliqlirini bildürgen tramp, «uningdin kéyin néme qilidighanliqimizgha qarar qilimiz» dédi.

u, seudi erebistandiki néfit chekkilesh orunlirigha qilinghan hujumning intiqami süpitide amérika qoshma ishtatlirining irangha herbiy hujum qilishining muwazinetlik bolup – bolmaydighanliqigha dair bir soalgha «muwazinetlik bolidu, dep oylaymen. bu soalgha béridighan jawabim <hee>» dep jawab berdi.

donald tramp, aramkogha qilinghan hujumlar seweb bolghan néfit bahasidiki örleshning amérikigha tesir körsetmeydighanliqini sözlirige ilawe qildi.

bu jeryanda tramp, behreyin text warisi shahzadisi selman bin hemed al xelife bilen körüshüshtin ilgiri muxbirlargha bayanat bérip, iran bilen urush qilishni xalimaydighanliqini, biraq dölitining urush ayropilanliri, bashqurulidighan bombilirigha oxshash eng yaxshi qoral sistémilirigha ige ikenlikini eskertken halda «amérika qoshma ishtatliri urushqa tarixtiki héchqandaq dölette körülüp baqmighan derijide teyyar» dégenlerni qeyt qildi.

u iran bilen barliq diplomatiye yollirining axirliship – axirlashmighanliqigha dair bir soalgha «yaq, diplomatiye qetiy axirlashmaydu.  néme bolidighanliqini hergizmu bilgili bolmaydu. bir kélishim tüzüshni xalaydighanliqlirini bilimen. bir nuqtida bu ishqa yaraydu» dep jawab berdi.