rusiye «aramko hujumi» toghrisida aldirap yekün chiqarmasliq kéreklikini bildürdi
rusiyening birleshken döletler teshkilati (b d t) da turushluq daimiy wekili wassiliy nébénzia, aramkogha qilinghan hujumlarning jawabkarliri toghrisida yekün chiqirish üchün aldiraqsanliq qilmasliq kéreklikini éytti.
türkiye awazi radiyosi xewiri: rusiyening birleshken döletler teshkilati (b d t) da turushluq daimiy wekili wassiliy nébénzia, seudi erebistanning dölet igilikidiki néfit shirkiti – saudi aramkogha qilinghan hujumlarning jawabkarliri toghrisida bir – birige zit bayanatlarning barliqini, yekün chiqirish üchün aldiraqsanliq qilmasliq kéreklikini éytti.
b d t xewpsizlik kéngishining séntebir éyidiki nöwetchi bashliqi rus bash elchi wassiliy nébénzia seudi erebistanning aramko shirkitige qarashliq orunlargha qilinghan hujumlar toghrisida muxbirlargha bayanat berdi؛ u, amérika qoshma ishtatlirining hujumning arqisida iranning barliqi toghrisidiki bayanati heqqide toxtilip, «derhal xulase chiqarmayli, bir – birige zit bayanatlar bar. ensarullah jawabkarliqni üstige aldi. amérika qoshma ishtatliri, <jawabkar iran dewatidu>. qolimizda roshen bir kartina yoq» dédi.
wassiliy nébénzia, amérika pirézidénti donald trampning «qorallirimizni betlep, jezmleshtürüshni kütüp teyyar halette turuwatimiz.» dégen sözige dair bir soalgha «bu xil weqelerning téximu éghir toqunushlarni keltürüp chiqirishidin küchlük endishe qilimiz. pars qoltuqi we uning etrapida yetküdek mesile bar. chong bir toqunush choqum pajie bilen axirlishidu» dep jawab berdi.
seudi erebistanning dölet igilikidiki néfit shirkiti – saudi aramko qarmiqidiki ikki néfit chekkilesh ornida shenbe küni shu jay waqti saet 04:00 te qoralliq uchquchisiz hawa apparati hujumigha uchrighandin kéyin ot apiti yüz bergenidi.
adem ölüsh yaki yarilinish körülmigen weqedin kéyin héchqandaq terep eyiblenmigen bolsimu, yemendiki husiylar yazma bayanat élan qilip hujumning jawabkarliqini üstige alghanidi.
iranning himayisidiki yemenlik husiylar, yéqinqi mezgillerde köpinchisi seudi erebistan hawa mudapie sistémiliri teripidin hawadiki chéghidila pachaqlap tashlanghan ottura we uzun musapilik ballistik bashqurulidighan bomba we qoralliq uchquchisiz hawa apparatlirini ishlitip seudi erebistanning bezi rayonlirigha hujum qilishni dawamlashturmaqta.
