riyad: aramko shirkitige qilinghan hujumdin kéyin néfit ishlepchiqirishni waqitliq toxtattuq

türkiye awazi radiyosi xewiri: seudi erebistan énérgiye ishliri ministiri shahzade abduleziz bin selman, seudi erebistan néfit shirkiti «saudi aramko» gha uchquchisiz hawa apparati bilen qilinghan tünügünki hujumlar sewebidin néfit ishlepchiqirishning waqtinche toxtitip qoyulghanliqini uqturdi.

énérgiye ishliri ministiri shahzade abduleziz bin selman seudi erebistan resmiy xewer agéntliqi – spa teripidin tarqitilghan bayanatida, saudi aramko qarmiqidiki biqayq we hirays néfit muesseseliride ishlepchiqirishning waqitliq toxtitilghanliqini, ishlepchiqirish kemchilikining zapas néfit arqiliq toldurulidighanliqini bildürdi.

bin selman, deslepki mölcherleshlerge qarighanda, hujum peyda qilghan partlashlarning 5 milyon 700 ming waril (shirketning kündilik néfit ishlepchiqirishining texminen %50 i) xam néfit bilen teminleshning toxtap kétishini keltürüp chiqarghanliqini qeyt qildi.

u yene, mezkur hujumning kündilik otturiche 2 milyard waril küp halitidiki néfit gazi ishlepchiqirishining toxtap kétishinimu keltürüp chiqarghanliqini, buning bashqa tebiiy mehsulatlar bilen teminleshning %50 etrapida töwenlep kétishige seweb bolidighanliqini bildürdi.

hujumning ichki bazarda néfit qisliqi peyda qilmaydighanliqini bildürgen ministir bin selman, shirkette körülgen maddiy ziyanni éniqlap chiqish xizmetlirining dawamlishiwatqanliqini qeyt qildi.

seudi erebistanning milliy néfit shirkiti «saudi aramko» ning ikki zawati tünügün shu jay waqti saet 04:00 te qoralliq uchquchisiz hawa apparatining hujumigha uchrighanliqi, hujumdin kéyin zawutta ot apiti yüz bergenliki uqturulghanidi.

qoralliq uchquchisiz hawa apparatliri bilen qilinghan hujumlardin kéyin héchqandaq terep ochuq – ashkara eyiblenmigen bolsimu, yemendiki husiylar yazma bayanat élan qilip, hujumni özlirining sadir qilghanliqigha isharet qilip ötkenidi.