kaliforniyede ot ketken kémidiki kishiler qutquzulalmidi

türkiye awazi radiyosi xewiri: kaliforniye ishtatining jenubiy déngiz tewelikide ot ketken kémidiki yoqap ketkenlerni izdesh-qutquzush xizmetliri, kémidiki 34 kishining jénidin ayrilghanliqining éniqlinishi bilen toxtitildi.

santa barbara (Santa Barbara) nahiyesining bashliqi bil brown izdesh-qutquzushta qutquzuwélinghanlarning yoqluqini we bügün (4-séntebir) din bashlap izdesh-qutquzush ishlirining toxtitilghanliqini bildürdi.

u kémining astinqi qewitide uxlawatqan 34 kishining qéchish yollirining ot yalquni étilgenlikini we kémining üstünki qewitide uxlighan besh kéme xadimidin bashqa, héchkimning qutquzulalmighanliqini qeyt qildi.

u ot kétish sewebining tekshürülüwatqanliqini, jénidin ayrilghan 33 kishining yoluchi, bir kishining bolsa kéme xadimi ikenlikini؛ 20 kishining jesitining déngizdin chiqirilghanliqini, kémining 18 métir chongqurluqqa chöküp ketkenlikini eskertti.

u yene, jesetlerning kimlikining DNA tekshürüshi netijiside éniqlinidighanliqini, shunga aililerdin DNA ewrishkiliri élinghanliqini qeyt qildi.

amérika sahil bixeterlikini qoghdash qismining bayanatchisi monika rochéstér (Monica Rochester) alte kéme xadimi we 33 yoluchini öz ichige alghan 39 kishi olturghan kémige, 2-séntebir küni saet 03:15 te namelum sewebler tüpeylidin ot ketkenlikini élan qilghan idi.

monika rochéstér uzunluqi 23 métir kélidighan «konsépshin» (Conception) namliq ghewwaslar kémisige, quruqluqtin texminen 32 kilométir yiraqliqtiki déngiz tewelikide santa kruz (Santa Cruz) arili etrapida ot ketkenlikini eskertip: «bir kémide eng axirida yüz bérish éhtimali bolghan ish ot, bu sewebtin eng nachar ehwalgha teyyarliqimiz bolushi kérek» dégen idi.