sherqiy quddusta bezi pelestinliklerning öyliri örüwétildi
: isirailiye qoralliq küchliri ishghal astidiki sherqiy quddusta ayrish témining dawami hésablinidighan tikenlik sim tosuqlargha yéqin ikenlikini seweb qilip, pelestinliklerning bezi öylirini örüshke bashlidi.
türkiye awazi radiyosi xewiri: isirailiye qoralliq küchliri ishghal astidiki sherqiy quddusta ayrish témining dawami hésablinidighan tikenlik sim tosuqlargha yéqin ikenlikini seweb qilip, pelestinliklerning bezi öylirini örüshke bashlidi.
yerlik menbelerdin élinghan melumatlargha asaslanghanda, nurghun isirailiye eskerliri we saqchiliri bügün (22-iyul) etigendin bashlap sherqiy quddusning sur bahir rayonigha jaylashqan wadi elhummus mehellisige barghan. saqchilar isirailiye aliy sotining sur bahir rayonidiki ayrish témining dawami hésablinidighan tikenlik sim tosuqlargha yéqinliqini seweb körsitip öylirini örüsh qarari chiqqan pelestinliklerning bezilirini öyliridin mejburyi chiqarghan.
buninggha naraziliq bildürgen mehelle xelqi bilen isirailiye saqchiliri otturisida sürkilish yüz bergen. hazirghiche ikki qewetlik bir bina örülgen.
rayondiki bezi öylerni örüsh üchün teyyarliqlar dawamlishiwatqan bolup, isirailiye saqchiliri rayonda qurulushi qiliniwatqan köp qewetlik bir binani örüsh üchün partlatquch qoyghan.
isirailiye aliy soti öyken ay sur bahirdiki binalarning ayrish témining dawami bolghan tikenlik sim tosuqlargha yéqinliqi sewebidin «bixeterlik tehditi» peyda qilidighanliqini ilgiri sürüp örüwétishke höküm qilghan we öy igilirige 18-iyunghiche binalarni örüsh üchün möhlet bergen idi. bezi pelestinlikler qurulushi qiliniwatqan 10 binani örüshni toxtitish üchün aliy sotqa erz sunghan bolsimu, ezri ret qilinghan idi.
mutexessisler, isirailiye sotining bu qararining bashqa rayonlardimu nurghun öylerning örüwétilishige seweb bolidighanliqi toghrisida agahlandurmaqta.
