gérmaniye dölet mudapie ministiri yawropa ittipaqi komitétining reisi boldi

türkiye awazi radiyosi xewiri: yawropa parlaménti omumiy kéngishi firansiyening strasburg (Strasbourg) shehiride toplandi we yawropa ittipaqi komitétining reisi üchün bélet tashlidi. 383 awazning qollishi, 327 awazning qarshi turushi we 22 awazning hoquqidin waz kéchishi bilen, gérmaniye dölet mudapie ministiri ursula fondér layén yawropa ittipaqi komitétining reislik wezipisige saylandi.

yawropa ittipaqigha eza döletlerning rehberliri yawropa ittipaqi komitétining reislik wezipisige uzungha sozulghan talash-tartish netijiside, ursula fondér layénni körsetken idi. ursula fondér layén yawropa ittipaqi komitétining reislik wezipisige teyinlengen tunji ayal bolup qaldi. siyasetke 43 yéshida bashlighan we gérmaniyening tunji ayal dölet mudapie ministiri bolghan ursula fondér layén 2013-yilidin béri bu wezipisini ötep kéliwatqan idi.

ursula fondér layén bélgiyede tughulghan bolup, 13 yashqa kirgende ailisi gérmaniyege köchüp kelgen. u hazir 61 yash, bash ministir angéla mérkél rehberlik qiliwatqan xiristiyan démokrat ittipaqi partiyesi (CDU) ning ezasi. xanowér (Hanover) tibbiy fakultétini püttürgen. yette perzenti bar. némische, finransuzche we ingilizche tillirini bilidu.  xiristiyan démokrat ittipaqi partiyesi yawropa ittipaqi komitétidiki birinchi partiye bolghan yawropa xelq partiyesi (EPP) terkibide heriket qilidu.

ursula fondér layén «yawropa armiyesi» qurushni teshebbus qilidu. uzun waqittin buyan ministirliqning xizmetchisi bolmighan meslihetchilerni ishletkenliki üchün, uning üstide tekshürüsh barliqi melum.

yawropa ittipaqi qurulmisi ichide qanun chiqirish musapisini bashlaydighan we ittipaqning ijra qilish orgini hésablinidighan, ittipaqning xamchotini we pirogrammilirini ijra qilishqa we memuriy jehettin nazaret qilishqa mesul bolghan yawropa ittipaqi komitétining reisliki muhim orunlarning birsi. yawropa ittipaqi komitétida, komissarlardin bashqa, yawropa ittipaqi xizmetchiliridin teshkil tapqan 25 ming kishilik memuriy teshkilat bar.

yawropa ittipaqi komitétining hazirqi reisi liyuksémburluq jangkér (Jean-Claude Juncker) ning wezipe ötesh mudditi 2019-yili 31-öktebirde axirlishidu.

ursula fondér layén 2019-yili 1-noyabir wezipisini bashlaydu.