20 dölet guruhi bashliqlar yighini bashlandi
yaponiyening sahibxaniliqida osaka shehiride uda ikki kün dawamlishidighan 20 dölet guruhi bashliqlar yighini yaponiye bash weziri shinzo abéning méhman rehberlerni qarshi élishi we xatire süretke chüshülüshi bilen bashlandi.
türkiye awazi radiyosi xewiri: jumhur reis rejep tayyip erdoghan xatire sürette amérika qoshma ishtatliri pirézidénti donald tramp bilen yanmuyan turdi.
jumhur reislik sariyi uchur - alaqe ishliri bashqarmisining bashliqi fahrettin altun, ammiwi ortaqlishish tor béti Twitter sehipiside, 20 dölet guruhi bashliqlar yighinigha munasiwetlik hembehirleshken foto süretlerde bolsa, jumhur reis rejep tayyip erdoghanning rusiye pirézidénti wiladimir putin we firansiye pirézidénti émmanuél makron bilen söhbetlishiwatqanliqi körülidu. bolupmu jumhur reis rejep tayyip erdoghanning firansiye pirézidénti émmanuél makron bilen semimiy söhbetlishish jeryanida uning mürisige qolini qoyushi diqqet qozghaydu.
jumhur reis erdoghan kéyinche herqaysi döletlerning rehberliri bilen birlikte «digital iqtisad» témiliq yighingha qatnashti, yighindin kéyin xizmet ziyapiti bérildi.
ziyapettin kéyin jumhur reis rejep tayyip erdoghan bilen rusiye pirézidénti wiladimir putin semiimiy söhbetleshti.
bu ariliqta, türkiye tashqi ishlar ministiri mewlüt chawushoghlu bilen xezine we maliye ministiri berat albayraqmu erdoghan bilen putingha hemrah boldi.
jumhur reis rejep tayyip erdoghan bashliqlar yighini paaliyetlirige qatnishishtin sirt yene, ikki tereplik uchrishishlarnimu élip bérishqa bashlidi. erdoghan aldi bilen dunya bankisining bashliqi deywid malpasni qobul qildi. uchrishish yérim saet dawamlashti.
