sabiq sérb eskerge qamaq jazasi bérildi
bosniye-gértségowina sot mehkimisi sabiq sérb eskerge insaniyetke qarshi ötküzülgen jinayet sewebidin 13 yilliq qamaq jazasigha höküm qildi.
türkiye awazi radiyosi xewiri: bosniye-gértségowina soti sabiq esker srétko pawij (Sretko Pavic) ni 1995-1992 –yilliri arisida bosniye-gértségowinada yüz bergen urushta, insaniyetke qarshi jinayet ötküzgenliki sewebidin 13 yilliq qamaq jazasigha höküm qilindi.
bosniye-gértségowina sotining bu heqtiki yazma bayanatida, srétko pawijning 1992-yili sérb eskerler we saqchilar teripidin bosniye-gértségowinaning shimaligha jaylashqan prijédor (Prijedor) da sérbtin bashqa milletlerge qilghan sistémiliq hujumlargha aktip qatnashqanliqi sewebidin insaniyetke qarshi jinayet ötküzüsh bilen eyiblinip 13 yilliq qamaq jazasigha höküm qilinghanliqi eskertildi.
bayanatta, sabiq esker pawijning prijédordiki boshnaqlarning öy-makanliridin mejburiy ayrilishi we öltürülüsh weqelirige qatnashqanliqi bildürüldi.
pawijning insaniyetke qarshi ötküzülgen jinayiti heqqidiki sot bügün (24-iyun) échildi.
bosniye-gértségowinadiki urush bashlanghan 1992-yili mart éyida prijédordiki 13 saqchixanida xizmet qilghan 1775 sérb saqchi bir ay ichidila qorallandurulghan. sérb qoralliq qisimliri 1992-yili 29-aprél kéchisi eyni waqitta nopusning köpinchisi boshnaq bolghan prijédor shehirini igelliwalghan. shu yili 23-may prijédor etrapidiki yézilargha hujum qilip, 102 kichik balini öz ichige alghan 3176 ademni qirghin qilghan. prijédordiki texminen 30 ming puqra omarska (Omarska), keratérm (Keraterm), kozaraj (Kozarac), trmopolzhé (Trnopolje) we manzhaja (Manjaca) diki jaza lagérlirigha solanghan. onminglarche adem tughulghan öz yurtliridin qoghlanghan.
