islam hemkarliq teshkilati arakan musulmanlirigha yardem qildi

türkiye awazi radiyosi xewiri: islam hemkarliq teshkilati teripidin bu heqte élan qilinghan yazma bayanatta eskertilishiche, islam hemkarliq teshkilati  bangladéshtiki musapirlar lagérlirida qéliwatqan arakan musulmanliri duch kéliwatqan qiyinchiliqni jiddiy hel qilish meqsitide insanperwerlik yardem buyumliri ewetken. buningdin bashqa yene, rayonda «islam hemkarliq teshkilati» isimlik bir mektep qurulushi bashlanghan.

bayanatta yene, islam hemkarliq teshkilatining palaketke duch kelgen barlq musulman xelqlerning yénida ikenliki qeyt qilinghan.

arakanda 2012 – yili buddistlar bilen musulmanlar otturisida yüz bergen toqunushlarda köpinchisi musulmanlardin bolup, minglarche kishi qetl qilinghan, yüzlerche öy - makan we ish orunlirigha ot qoyup bérilgenidi.

arakandiki chégra qarawulxanilirigha 2017 – yili 25- awghust küni birla waqitta qilinghan hujumlarni seweb körsetken birma armiyesi we buddist milletchiler ammiwi zorawanliq heriketlirini bashlighanidi.

birleshken döletler teshkilati 2017 – yili 25 – awghusttin kéyin arakandiki bésim we zulumdin qéchip bangladéshtin panahliq tiligenler sanining 745 minggha yetkenlikini bildürgenidi. xelqara kishilik hoquq teshkilatliri süniy hemrah körünüshlirini élan qilish arqiliq yüzlerche yézining  weyran qilinghanliqini ispatlighanidi.

bangladésh dölettiki arakanliq köchmenlerning öz yurtlirigha qaytiishi üchün birma bilen tüzgen kélishimdin waz kechti. xelqaraliq axbarat wasitiliri bilen insanperwerlik yardem teshkilatlirining arakan rayonigha kirishige asasiy jehettin cheklime qoyghan birma hökümiti bolsa, arakan musulmanlirining yurtlirigha qaytishini ishqa ashurush toghruluq bergen wedisige emel qilmidi.

igilinishiche, birleshken döletler teshkilati we xelqara kishilik hoquq teshkilatliri arakan musulmanlirigha qaritilghan zorawanliqni «étnik tazilash herikiti» yaki «irqiy qirghinchiliq» dep ataydiken.