makron papa firansisni teklip qildi
firansiye pirézidénti makron katolik dunyasining rohaniy rehbiri papa firansiskus (Papa Franciscus) bilen téléfonda tarixiy notrédem katédrali (Notre Dame) ligha ot kétish weqesi heqqide söhbetleshkenlikini we uni firansiyege teklip qilghanliqini éytti.
türkiye awazi radiyosi xewiri: firansiye pirézidénti makron parizhdiki tarixiy notrédem katédraligha ketken otni öchürüshke qatnashqan pazharni xadimlirini élsiy sariyida qobul qildi.
u papa firansiskus bilen bolghan téléfon söhbiti üstide toxtilip: «uni firansiyege teklip qildim, muwapiq waqitta kélidu» dédi.
u pazharni xadimlirigha: «otni öchürüsh üchün özenglarni xeterge atqininglar üchün teshekkür éytimen. sizlerni közitip turghan firansiyege we pütkül dunyagha ülge boldunglar» dédi.
watikan tarixiy notrédem katédralini «xiristiyanliqning firansiyediki simwoli» dep qaraydu. düshenbe küni (15-aprél) parizhning simwolliridin biri bolghan notrédem katédraligha ot kétip, égizliki 93 métir kélidighan munarlardin biri we ögzisi köyüp örülüp chüshti. ot öchürüshke texminen 400 pazharni xadimi qatnashti we qattiq tirishchanliq körsitish netijiside shimaliy dang munari bilen «ana bina» qutquzuwélindi.
parizh teptish xadimi rémy héytz (Remy Heitz) notrédem katédraligha ot kétish weqesi üstide toxtalghanda, weqening «qesten ot qoyup bérish» emeslikini, belki «hadise» dep qarawatqanliqlirini bildürgen idi.
bash ministir édward filip köyüp ketken munarlarning birini qaytidin yasash üchün xelqaraliq qurulush musabiqisi uyushturulidighanliqini élan qilghan idi.
firansiye ichki ishlar ministiri kristof kastanér «ana bina» ning asasen dégüdek qutquzuwélinghanliqini, biraq ichidiki nurghun tarixiy yadikarliqlarning buzghunchiliqqa uchrash xetirining barliqini éytqan idi.
