dunya döletliri parizhdiki notrédem katédrali heqqide qayghulirini ortaqlashti

türkiye awazi radiyosi xewiri: ispaniye bash ministiri pédro sanchéz (Pedro Sanchez) twittérda élan qilghan bayanatida: «notrédemgha ot ketkenliki firansiye üchün apet hésablinidu. ispaniye we yawropa üchünmu shundaq. ot yalquni 850 yilliq tarixni, binakarliq qurulushini köydürüp kül qilmaqta. buni untush nahayiti tes bolidu. firansiye bu chong bayliqni qutquzup qélishta biznimu oylishi mumkin» dédi.

italiye bash ministiri juzuppé konti (Giuseppe Conte) twittérda firansuzche hembehirligen uchurida: «firansuzlar üchün, yawropaliq bolghan hemmimiz üchün qelbimizde weyranchiliq boldi» dédi.

gérmaniye bash ministiri angéla mérkél parizhda yüz bergen weqedin chongqur qayghurghanliqini bildürüp: «oy-xiyalimiz firansuz dostlirimiz bilen bille» dédi.

awstiriye pirézidénti aléksandér wan dérbéllén (Van der Bellen) twittérda: «parizhdiki kishini chöchütidighan we kishini biaram qilidighan menzireler. heshemetlik notrédem katédrali köyüwatidu, oy-xiyalimiz parizh bilen bille» dégen uchurni hembehirlidi.

engliye bash weziri tirésa méy twittérda, ot öchürüshke qatnashqanlarni yéqindin qollaydighanliqini bildürdi.

yawropa ittipaqi kéngishining bashliqi donald tusk (Donald Tusk) twittérda hembehirligen uchurida: «bügün hemmimiz parizh bilen bille» dédi.

yawropa ittipaqi komitéti bashliqi yin klawud jankér (Jean-Claude Juncker) ijtimaiy taratqulardin notrédem katédralida chiqqan ot heqqide minutmu minut ehwal igilep turghanliqini eskertip: «néme dégen qorqunchliq minutlar, barliq firansuz xelqining héssiyatigha ortaqlishimen» dédi.

yawropa parlaménti bashliqi antoniyo tazhani (Antonio Tajani) ot öchürüshke qatnashqanlargha jasaret, gheyret-shijaet tilidi.

nato bash katipi stolténbérg (Stoltenberg) bu heqte élan qilghan uchurida, weqedin chongqur qayghurghanliqini bildürüp: «oy-xiyalimiz, yawropaning eng muhim simwolini qutquzushqa tirishqanlar we firansuz xelqi bilen bille» dédi.

watikanning bu heqtiki bayanatida, notrédem katédraligha ot ketkenliki, qattiq chöchüsh we chongqur qayghu peyda qilghanliqi, bu tiragédiyelik ehwalgha qarshi küresh qilghan ot öchürüsh xadimliri üchün dua qilinghanliqi qeyt qilindi.

amérika pirézidénti donald tramp twittérda: «parizhdiki notrédem katédraligha ot ketkenlikini körüsh nahayiti qorqunchliq. belkim otni öchürüsh üchün tik ucharlarni ishlitish mumkin idi, téz heriket qilish kérek» dédi.

iran tashqi ishlar ministiri zarif jewadmu twittérda bayanat élan qilip: «notrédem katédralining 800 yil boyiche urushlar we yer tewreshlerge berdashliq bérip, qismen buzghunchiliqqa uchrighanliqidin tesirlengen iduq. oy-xiyallirimiz firansuzlar we barliq katoliklar bilen bille» dédi.