iran tashqi ishlar ministirliqi amérikaning eyiblishini ret qildi
iran tashqi ishlar ministirliqi bayanatchisi abbas musewi iranliq mutexessislerning wénézuéla hökümitining telipige binaen su we éléktir sistémilirini yaxshilash üchün yardem qiliwatqanliqini bildürdi.
türkiye awazi radiyosi xewiri: iran tashqi ishlar ministirliqining bayanatchisi abbas musewi wénézuéla hökümitining telipige binaen iranliq mutexessislerning wénézuélagha yardem qiliwatqanliqi toghrisida bayanat élan qildi. u yazma bayanatida, amérika tashqi ishlar ministiri mayk pompéyoning, «iran wénézuélaning ichki ishlirigha arilishiwatidu» dégen sözlirige naraziliq bildürdi.
u donald tramp bashchiliqidiki amérikaning 19-esirdikige oxshash, latin amérikani özining arqa hoylisigha aylandurushni xalaydighanliqini eskertip: «amérika shuni untup qéliwatidu: pütkül dunya xelqige oxshash latin amérika xelqimu oyghandi, pelekning charqi tetür chörgilimeydu. amérika wénézuélaning 30 milyard dollar tashqi péréwotini bulash arqiliq wénézuéla xelqini iqtisadiy térrorluqning nishanigha aylandurdi. amérika wénézuéla xelqige, qanunluq hökümetke qarshi isyan qilishni yaki acharchiliqqa chidash yolidin birni sunmaqta» dédi.
amérika tashqi ishlar ministiri mayk pompéyo tünügün (14-aprél) élan qilghan bayanatida, iranni wénézuélaning ichki ishlirigha arilishish bilen eyibligen idi.
iranning «mahan» (Mahan Air) hawa yolliri shirkiti 8-aprél (2019) téhrandin wénézuéla paytexti karakasqa biwaste ayropilan seperlirini bashlighan idi.
مۇناسىۋەتلىك خەۋەرلەر
