b d t: qashiqchi jinayitini tekshürüshke seudi erebistan tosqunluq qildi
birleshken döletler teshkilati türkiyening seudi erebistanliq zhurnalist jamal qashiqchi jinayitini keng dairilik, biterep we ochuq - ashkara halda tekshürshige seudi erebistanning tosqunluq qilghanliqini bildürdi.
türkiye awazi radiyosi xewiri: birleshken döletler teshkilati qanundin sirtqi jaza hadisiliri alahide doklatchisi agnés kallamard, ötken hepte türkiyede seudi erebistanliq zhurnalist jamal qashiqchi jinayiti toghruluq xizmet ishligendin kéyin doklat élan qildi.
kallamardning doklatida mundaq déyildi: «seudi erebistanliq zhurnalist jamal qashiqchi aldin tüzülgen suyiqestlik pilangha asasen wehshiylerche öltürüldi. delil – ispatlar jamal qashiqchining jinayitining seudi erebistan dairiliri teripidin sadir qilinghanliqini körsitidu. türkiyening qashiqchi jinayitini keng dairilik, biterep we ochuq - ashkara halda tekshürshige seudi erebistan tosqunluq qildi. türkiye tolimu qorqunuchluq bu jinayet toghruluq awazliq delil – ispatlarning bir qismini sundi, qashiqchining bundaq wehshiylerche öltürülüshi xelqara qanun we xelqara munasiwetlerning depsende qilinishi hésablinidu. axbarat organlirini bu jinayet heqqide téximu köp uchurlar bilen teminleshke chaqirimen, ziyaritim we jinayetni tekshürüsh paaliyetlirim jeryanida manga her jehettin qolayliq yaritip bergen türkiyege köptin- köp rehmet éytimen.»
seudi erebistanliq zhurnalist jamal qashiqchi bultur 2 – öktebir küni öylinishke alaqidar resmiyetlirini béjirish üchün seudi erebistanning istanbuldiki bash konsulxanisigha kirgendin kéyin wehshiylerche öltürülgenidi.
seudi erebistan dairiliri téxiche jamal qashiqchining jesitining nediliki toghruluq bayanat élan qilmidi.
