xelqaraliq tekshürgüchiler yemenning hudeyde shehirige yétip bardi
b d t xelqaraliq urush toxtitish tekshürgüchiliri gollandiyelik général patrik jammarértning bashchiliqida yemenning port shehiri hudeydege yétip bardi.
türkiye awazi radiyosi xewiri: yerlik menbelerdin élinghan melumatlargha asaslanghanda, gollandiyelik général patrik jammarért bashchiilqidiki urush toxtitish tekshürgüchiliri paytext sanadin tashyol bilen hudeydediki b d t merkizige yétip barghan.
urush toxtitish tekshürgüchilirining hudeyde portini ziyaret qilidighanliqi bildürüldi. tekshürgüchilerning sheherge yétip kélishi bilen hökümet küchliri bilen husiylar otturisida shiddetlik toqunushlar yüz berdi.
herbiy menbelerde körsitilishiche, husiylarning qoralliq küchliri hudeydening sherqidiki essalih we halqa baziri rayonida hökümet qisimlirigha hujum qilghan bolup, qarshiliq körsitish netijiside toqunush kélip chiqqan.
husiylarning «el mesire» téléwiziyesi hökümet qisimlirini weziyetni qaytidin keskinleshtürüsh we urush toxtitish kélishimini buzush bilen eyiblidi.
shiwétsiyede 6-dékabir bashlinip 13-dékabir axirlashqan muzakirelerdin kéyin, tereplerning yemen xelqi üchün hayatiy ehmiyetke ige hudeyde porti we shehiri toghrisida kélishim hasil qilghanliqi uqturulghan idi. hudeyde we etrapi üchün tüzülgen urush toxtitish kélishimi 18-dékabir ijra qilinghan idi.
gollandiyelik général jammarért tünügün (23-dékabir) hökümet teripidin waqitliq paytext süpitide jakarlanghan eden shehirige bérip, mesul dairiler bilen körüshken idi. u arqidin husiylarning kontrolluqidiki sanagha barghan idi.
b d t xewpsizlik kéngishi jüme küni (21-dékabir) ötküzülgen bélet tashlashta, yemenning hayatiy ehmiyetke ige port shehiri hudeydede urush toxtitishni qollighan we rayongha xelqaraliq tekshürgüchilerchilerni ewetish toghrisidiki teklip layihesini qobul qilghan idi.
