«hudeyde» de urush toxtitish kélishimi ijra qilinishqa bashlidi

türkiye awazi radiyosi xewiri: melumatlargha qarighanda, urush toxtitish kélishimi, birleshken döletler teshkilatining közitishi astida shiwéytsariyede ishqa ashurulghan muzakirilerde yemenlik terepler ara hasil qilinghan kélishimge asasen, «hudeyde» shehiride shu jay waqti  saet 0 din étibaren ijra qilinishqa bashlighan.

yemen xelqige nisbeten nahayiti zor ehmiyetke ige bolghan »hudeyde porti» we «hudeyde shehiri» üchün hasil qilinghan kélishimge asasen, «birleshken döletler teshkilatining portta rehberlik qilish roli» ni jari qildurushi, yemenge insanperwerlik yardem buyumlirini yetküzüp bérish üchün sharait yaritip bérilishi, bu arqiliq minglarche yemen xelqining turmush sharaitini yaxshilash nishanigha yétilishi kütülmekte iken.

sheherde tünügün hökümet küchliri bilen husiylar otturisida yéqinqi bir heptidin buyanqi toqunushlar intayin keskinliship ketkenidi.

yemen tashqi ishlar ministiri xalid yemani hudeyde  nahiyeside urush toxtitish kélishimining 18 – dékabir seyshenbe küni saet 0 din étibaren ijra qilinishqa bashlighanliqini bildürgenidi.

birleshken döletler teshkilati bash katipi antonio gutérrés 13 – dékabir küni shiwéytsariyede axirlashqan «yemen» témiliq kéngesh  yighinliridin kéyin élan qilghan bayanatida, yemen xelqi üchün nahayiti zor ehmiyetke ige  bolghan«hudeyde porti» we «hudeyde shehiri» üchün tereplerning kélishim hasil qilghanliqini uqturghanidi.

igilinishiche, terepler kélishimge riaye qilidighanliqlirini bildürgen bolup, sheher ahalisi tinch yashimaqta iken.