yemende husiylarning kélishimge boysunushi telep qilindi

türkiye awazi radiyosi xewiri: yemen tashqi ishlar ministiri xali el yemani b d t yemen alahide wekili martin grifisqa mektub ewetip, teleplirini otturigha qoydi. xalid el yemani martin grifisqa ewetken mektubida, b d t din husiylarning hudeyde wilayitidin we portliridin chékinishni kapalet astigha élish üchün kélishimge qetiy boysunidighanliqini ispatlishi lazimliqini telep qildi.

u husiy qoralliq küchlirining oxshimighan namlar astida hudeydede turmasliqi, sheherning husiylar teripidin talan-taraj qilinmasliqi we sheher xelqining urush jinayetchiliri bolghan husiylarning merhemetige tashlap qoyulmasliqi kéreklikini telep qildi.

u b d t yemen alahide wekili martin grifistin munasiwetlik barliq organlarning kélishimni ijra qilish üchün qetiy iradilik bolushinimu telep qildi.

husiylarning aliy inqilabiy komitéti bashliqi muhemmed eli elhusiy amérika, seudi erebistan we ereb birleshme xelipilikidin teshkillengen «xelqaraliq birleshme qisim» ning, urush toxtitishqa boysunushini ümid qilidighanliqlirini élan qilghan idi.

tashqi ishlar ministiri xalid el yemani yemen döletlik téléwiziyeside bayanat élan qilip, urush toxtitish kélishimining, husiylar we barliq qoralliq küchlerning hudeyde portliridin chékinishni telep qilidighanliqini, hökümet qisimlirining sheherning jenubiy we sherqiy tereplirige chékinidighanliqini bildürdi.

b d t bash katipi antoniyo gutérs 13-dékabir (peyshenbe) shiwétsiyede axirlashqan yemen yighinidin kéyin élan qilghan bayanatida, yemen xelqi üchün hayatiy ehmiyetke ige hudeyde we sheher üchün tereplerning kélishim tüzülgenlikini uqturghan idi.

u kélishim boyiche «b d t ning portta rehberlik» rolini öz üstige alidighanliqini, yemenge insanperwerlik yardemliri yetküzüsh yolining échilidighanliqini؛ bu arqiliq milyonlarche yemenlikning turmush sharaitining yaxshilinidighanliqini eskertken idi.

u terepler bilen ortaq pikir birliki hasil qilinghanliqini, sheherge «insanperwerlik karidori» ning échilidighanliqini qeyt qildi.

u 2019-yili yanwar éyida ötküzülüshi pilan qilinghan yemen tinchliq söhbitide, siyasiy mesililerge munasiwetlik ramka kélishimining muzakire qilinishi üchün, terepler bilen kélishim hasil qilinghanliqini, buning tinchliq musapisidiki muhim ehmiyetke ige qedem bolidighanliqini bildürgen idi.