yawropa ittipaqi afghanistanning qayta qurulushigha yardem qilidu

türkiye awazi radiyosi xewiri: b d t (birleshken döletler teshkilati) bilen afghanistan hökümiti shiwéytsariye paytexti jenwediki b d t ishxanisida birlikte ötküzgen «afghanistan konféransi» da, yawropa ittipaqi komitéti bilen afghanistan otturisida iqtisadiy yardem pilan kélishimi imzalandi.

xelqara hemkarliq we tereqqiyat ishlirigha mesul yawropa ittipaqi komitétining ezasi néwén mimika bilen afghanistan maliye ministiri muhemmed humayun kaumi teripidin imzalanghan kélishimge asaslanghanda, yawropa ittipaqi komitéti afghanistanning qayta qurulushigha 474 milyon yawro yardem qilidiken.

iqtisadiy yardemning, afghanistanning qaytidin qurulushi, xususiy shirketlerning islahati, sehiye, edliye, saylam, köch we yurt-makanliridin ayrilishqa mejbur bolghanlargha yardem qilish meqsitige ige ikenliki qeyt qilindi.

yawropa ittipaqi komitéti ezasi mimika kélishim heqqide élan qilghan bayanatida: «yawropa ittipaqi afghanistanning güzel kélechek berpa qilishi üchün afghanistan we afghanistan xelqini qollimaqta» dédi.

kélishimde qeyt qilinishiche, iqtisadiy yardem pilanining 311 milyon yawroluq qismi afghanistanning qaytidin qurulushigha, 31 milyon yawroluq qismi edliye sahesige, 80 milyon yawroluq qismi sehiye we ozuqlinishqa, 15.5 milyon yawroluq qismi saylam basquchlirini qollashqa, 37 milyon yawroluq qismi köch we yurt-makanliridin mejburiy ayrilghanlargha qilinidiken.

afghanistan pirézidénti eshref ghéni konféransta qilghan sözide, chet el shirketlirini afghanistangha meblegh sélishqa chaqirdi.

amérikaning jenubiy we ottura asiya ishlirigha mesul muawin tashqi ishlar ministiri alis wéls b d t ning jenwediki merkizide ötküzülgen axbarat élan qilish yighinida konférans heqqide toxtilip, afghanistanning iqtisadiy jehettin tereqqiy qilishining, tinchliqning emelge éshishigha baghliq ikenlikini bildürdi.

u afghanistan hökümitining, döletning tereqqiy qilishigha qaritilghan islahatlarda muhim ilgirileshlerni qolgha keltürgenlikini, shundaq bolsimu qilinishi kérek bolghan nurghun ishlarning barliqini eskertti.

u konféransning xelqara jemiyetni talibanni derhal üstelge kélip, tinchliq musapisini bashlishi üchün chaqiriq qilish pursitige ige qilghanliqini bildürüp, afghanistan xelqining ichki urushtin zirikkenlikini, emdi tinchliqni xalaydighanliqini qeyt qildi.

u taliban gerche tinchliq dewatqan bolsimu, zorawanliqlarni azaytishning ornigha hujumlarni téximu köpeytiwatqanliqini bildürdi.

u amérika hökümitining taliban bilen biwaste körüshüp-körüshmigenliki heqqidiki soalgha, talibanning ismini tilgha almastin, amérikaning afghanistandiki barliq terepler bilen körüshkenlikini éytish bilen kupayilendi.